भांगरभूंय | प्रतिनिधी
कोलवाळ बंदखणींत अंगरक्षकाचे हाजिरेंत घडलो प्रकार
म्हापशें: कोलवाळ बंदखणींत वैजकी अधिकारी डॉ. योगेश गोवेकार हांकां आगुस्तीन कार्व्हालो ह्या कैद्यांन धमकी दिली. दवाखान्यांत घुसून आनी अंगरक्षकाचे हाजिरेंत हो प्रकार घडिल्ल्यान बंदखणींतलो दवाखानो आनी वैजकी अधिकाऱ्यांचे सुरक्षेचो प्रस्न परतून एकदां वयर सरला.
हालींच हो धमकीचो प्रकार घडलो. ह्या प्रकरणांत डॉ. गोवेकार हांणी बंदखण प्रशासना कडेन कागाळ दाखल केल्या. आपले सुरक्षेचे नदरेंतल्यान दवाखान्यांत गरजेचे उपाय येवजण करपाची विनंती तांणी बंदखण म्हानिरिक्षकां कडेन केल्या.
घडणुके वेळार डॉ. गोवेकार हे दवाखान्यांत आपली सेवा दिताले. ह्याच वेळार कैदी आगुस्तीन कार्व्हालो हो दवाखान्यांत जबरदस्तीन घुसलो आनी दोतोरांक गाळी संवून गंभीर परिणामाची ताणें धमकी दिली.
ह्या प्रकारा वेळार दोतोरांक अंगरक्षक म्हूण सेवा दिवपी सहाय्यक जेलर हो अधिकारी थंय हाजीर आशिल्लो. पूण ताणें ह्या दुबावीत कैद्याचे कृती कडेन हस्तक्षेप केलो ना. ताका लागून ह्या अंगरक्षक अधिकाऱ्याचे भुमिकेचेर लेगीत बंदखणींतल्यान अधिकाऱ्यांनी प्रस्न उपस्थीत केला.
तशेंच दवाखान्यांत एखाद्या कैद्याक वैजकी उपचार वा हेर कामा खातीर येवपाचें आसत जाल्यार ताका बंदखण कर्मचारी घेवन वतात. पूण हो कैदी ताच्या सेलांतल्यान भायर सरता आनी एकलोच थेट दवाखान्यांत घुसता, तोवूय खर बंदोबस्त आशिल्ल्या जेल कर्मचाऱ्यांची नदर चुकोवन. हो एकंदरीत प्रकार दुबाव घेवपा सारको आनी बंदखणीच्या सुरक्षेचो जाला. ताका लागून एकंदरीत प्रकरणाची चवकशी बंदखण प्रशासना कडल्यान जावची अशी अपेक्षा अधिकाऱ्यांनी उक्तायल्या.
हाचे पयलीं दोन वर्सां फाटीं एप्रील 2022 वर्सा कैदी सायरन रॉड्रिगीश हाणें बंदखणीचे तेन्नाचे वैजकी अधिकारी डॉ. दिलीप कुंकळयेंकार हांचेर हल्लो केल्लो. उपरांत एका सहाय्यक जेलराची बंदखणींतल्या दवाखान्यांत वैजकी अधिकाऱ्यांचे सुरक्षे खातीर अंगरक्षक म्हूण नेमणूक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
