वेवसायीक म्हाविद्यालय प्रवेश, अर्ज फाल्यां सावन घेवपाक जातली सुरवात

भांगरभूंय | प्रतिनिधी

पणजी, प्रतिनिधी : वैजकी, अभियांत्रिकी, फार्मसी, आयुर्वेदीक, नर्सिंग, होमिओपथी ह्या वेवसायिक म्हाविद्यालय प्रवेशा खातीरचे अर्ज फाल्यां 13 मे सावन घेवपाक सुरवात जातली. दर वर्सा प्रमाण अंदुं पसून तांत्रिक शिक्षण संचालनालया वरवी प्रवेश प्रक्रिया जातली. तांत्रिक शिक्षण संचालनालयाच्या गोप्पांनी ही म्हायती दिली.
प्रवेशाची म्हायती पुस्तिका तांत्रिक शिक्षण संचालनालयाच्या संकेतथळाचेर उपलब्ध आसा. प्रवेशाचे अर्ज 13 माय ते 24 माय 2024 हे कालावधींत सकाळी 10 ते सांजे 5 मेरेन सादर करचे, अशी सुचोवणी आसा. आयतारा अर्ज घेवचे नात. तांत्रिक शिक्षण संचालनालय (पर्वरी), पाद्रे कोन्सेसाव कॉलेज (वेर्णा), डॉन बॉस्को कॉलेज (फातोर्डा), आग्नेल इन्स्टिट्यूट (आसगाव), बांदेकर फार्मसी महाविद्यालय (फर्मागुडी) ह्या संस्थांनी प्रवेश अर्ज घेवपाची वेवस्था आसा.
इत्सुक विद्यार्थ्यानी 24 माय मेरेन अर्ज सादर करचे. वैजकी, दंत, आयुर्वेदीक प्रवेश नीट परीक्षेच्या गुणाचेर जातलो. अभियांत्रिकी पदवी प्रवेश जेईई परीक्षेच्या गुणाचेर जातलो. परिक्षेचे निकाल जाहीर जावंक नासले तरी ह्या तारखे भितर प्रवेश अर्ज सादर करप आवश्यक आसा, अशें तांत्रिक शिक्षण संचालनालयान कळीत केला. प्रवेश परीक्षांचो निकाल लागल्या उपरांत 5 दिसां भितर विद्यार्थ्याक गुण सादर करचे पडटले.