भांगरभूंय | प्रतिनिधी
पणजी, प्रतिनिधी : वेवसायिक शुल्काची थकबाकी भरपा खातीर विक्रेते तशेच हेर वेवसायिकां खातीर लागू केल्ल्या ओटीएस येवजणेंतल्यान सरकाराक 80 ते 90 कोटींची येणावळ येवपाची आस्त आसा. आतां मेरेन 10 हजारां परस उणी थकबाकी आशिल्ल्या 16412 वेवसायिकांनी येवजणेचो लाव घेतला. येवजणे अंतर्गत 48.5 कोटी रूपयांची रक्कम माफ जाल्या, अशें मुख्यमंत्री डॉ. प्रमोद सावंत हांणी सांगलें.
ही येवजण 8 ऑक्टोबर 2023 दिसा सुरू जाल्ली. ती 7 मार्च 2024 मेरेन आसतली. चडान चड वेवसायिकांनी येवजणेचो लाव घेवचो म्हूण वेवसायिक शुल्क खात्याच्या कार्यालयांनी हेल्प डेस्क सुरू केला. दनपारा अडेच ते पावणे स वरां मेरेन ते चालू आसतले. तशेंच येवजणे खातीर पोर्टला वरवी ऑनलायन अर्ज करपाची सुविधा आसा. अशे प्रकारची येवजण परत सुरू जावची ना. म्हूण इत्सुकांनी 7 मार्चा पयलीं अर्ज करून येवजणेचो लाव घेवचो, अशें आवाहन मुख्यमंत्री सावंत हांणी केलां. येवजणे खातीर खात्या कडेन सध्या 1300 अर्ज आयल्या. तांचो विचार सुरू आसा.
जीएसटी लागू जावचे पयली म्हणजे 30 जुन 2017 पयली ज्या उद्येजक वा वेवसायिकांनी वॅट फारीक करूक ना, तांकां सवलत दिवपी ही येवजण आसा. 10 हजार रूपया मेरेन थकबाकी आशिल्ल्या वेवसायिकांक सरकारान स्वेच्छा दखल घेवन येवजणेचो लाव दिला. 16412 लोकांक हाचो लाव जाला. हांचे खातीर 48.5 कोटी रूपया माफ जाल्या.
जीएसटी लागू जावचे पयली लक्झरी, मनरिजवण. सीएसटी, विक्री शुल्क, वॅटची थकबाकी फारीक करपा खातीर ही येवजण आसा.
जे विशीं कसलोच वाद ना (अनडिस्पुटेड ) तांकां शुल्कांत 20 टक्के आनी कळंतर, दंडात 100 टक्के सवलत दिवपाची तजवीज आसा. जे विशीं वाद आसा (डिस्पुटेड) तांका शुल्काच्या रकमेत 50 टक्के जाल्यार कळंतर, दंडाच्या रकमेत 100 टक्के सवलत मेळपाची तजवीज आसा. एनफोर्समेंट/ जप्तीच्या केशीं खातीर दंडाच्या रकमेत 50 टक्के आनी कळंतरांत 100 टक्के सवलत दिवपाची तजवीज येवजणेंत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
