भांगरभूंय | प्रतिनिधी
अर्ज तांत्रिक शिक्षण संचालनालयात सादर करचे
पणजी : वैजकी, अभियांत्रिकी, फार्मासी, आयुर्वेदिक ह्या पदवी वेवसायिक अभ्यासक्रमा खातीर प्रवेश अर्ज करपाची मुजत 30 मे मेरेन वाडयल्या. पयलीं 24 मे मेरेन ही मुजत आशिल्ली. कोणें अर्ज करूंक नात, तांणी 30 मे मेरेन अर्ज करचे, अशें तांत्रिक शिक्षण संचालनालान कळीत केलां.
वैजकी, अभियांत्रिकी, फार्मासी, आयुर्वेदीक, नर्सिंग ह्या वेवसायिक म्हाविद्यालय प्रवेशाची प्रक्रीया 13 मे सावन सुरू जाल्ली. दर वर्सा प्रमाण अंदूंय तांत्रिक शिक्षण संचालनालया वरवीं प्रवेश प्रक्रिया जातली.
प्रवेशाची म्हायती पुस्तीका तांत्रिक शिक्षण संचालनालयाच्या संकेतथळाचेर उपलब्ध आसा. प्रवेशाचे अर्ज 13 मे ते 24 मे 2024 हे कालावधीत सकाळीं 10 ते सांजे 5 मेरेन सादर करपाची मुजत आशिल्ली. ही मुजत आता 30 मे मेरेन वाडयल्या. प्रवेशा खातीर 3 हजार परस चड अर्ज आयल्या. तांत्रिक शिक्षण संचालनालय (पर्वरी), पाद्रे कोन्सेसाव कॉलेज (वेर्णे), डॉन बोस्को कॉलेज (फातोड्डें), आग्नेल इन्स्टिट्यूट (आसगांव), बांदेकर फार्मसी महाविद्यालय (फर्मागुडी) हे संस्थानी प्रवेश अर्ज घेवपाची वेवस्था आशिल्ली. आता मात फकत पर्वरी हांगच्या तांत्रिक शिक्षण संचालनालयात प्रवेशाचे अर्ज घेतले. हेर कडेन आता अर्ज घेवचे नात.
वैजकी, दंत, आयुर्वेदीक प्रवेश नीट परीक्षेच्या गुणाचेर जातले. अभियांत्रिकी, फार्मासी प्रवेश जेईई परीक्षेच्या गुणाचेर जातले. परीक्षेचे निकाल जाहीर जावंक नासले तरी ह्या तारखे भितर प्रवेश अर्ज सादर करप आवश्यक आसा, अशें तांत्रिक शिक्षण संचालनालयान कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
