भांगरभूंय | प्रतिनिधी
पर्वरी ः आदले मंत्री प्रकाश वेळीप हांणी विधानसभा अधिवेशन सुरु आसतना म्हजेर आरोप करुन सभापती म्हूण म्हज्या विशेशअधिकारांचो अपमान केलो. तांकां विधानसभेंत आपोवन हे विशीं जाब विचारतलों अशें निवेदन सभापती रमेश तवडकार हांणी आयज सभाघरांत केले.
सभापती तवडकार हांणी कोटी रुपया खर्च करून काणकोणांत वेगवेगळ्यो कार्यावळी घडोवन हाडल्यात. तांच्या शिक्षणीक संस्थांकूय कोटी रुपयांचो निधी मेळ्ळां. हें सगळें कायदेशीर आसा काय ना हाची चवकशी सरकारान करची अशी मागणी उटाचे अध्यक्ष प्रकाश वेळीप हांणी काल पणजेंत पत्रकार परिशदेंत केली. ह्याच विशयाचेर सभापती तवडकार हांणी आयज सकाळीं प्रस्न काळ सोंपतकच सभाघरांत निवेदन दिलें.
अधिवेशन सुरु आसतना वेळीप हांणी म्हजेर आरोप केल्यात. सभापती म्हूण म्हज्या विशेशअधिकारांचो ताणें अपमान केलो. फाल्यां सभाघरांत आपोवन तांका हें विशीं जाब विचारतलों अशें सभापती तवडकार हांणी निवेदनांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
