भांगरभूंय | प्रतिनिधी
मडगांव, प्रतिनिधी ः वेळसांवचे दर्यादेगे लागसार सोऱ्याचे नशेंत लालू उर्फ सनी सिंह हाच्या खून प्रकरणांत दिनेश कुमार आनी शिवनाथ मांझी ह्या दोन दुबावितांक न्यायालयान दोशी थारायल्ले. शुक्रारा जाल्ले सुनावणेंत दोगांय दुबावितांक जल्मभर बंदखणीची ख्यास्त फर्मायली.
वेळसांवा 2021 वर्सा जाल्ल्या स्थलांतरीत मजुराच्या खून प्रकरणांत वेर्णा पुलिसांनी दोग जाणांक अटक केल्ली. मुळ कर्नाटकांतलो आनी नुस्तेंमारी बोटींचेर काम करपी लालू उर्फ सनी सिंग (28) हाची कूड 2 एप्रील 2021 दिसा वेळसाव दर्यादेगे लागसारच्या शेडांत मेळ्ळी. वेर्णा पुलिसांनी केल्ल्या चवकशेंत मेल्ल्या मनशाचे कुडीचेर जखमांच्यो खूणा मेळिल्ल्यान खूनाचो गुन्यांव नोंद केल्लो. हे प्रकरणाची चवकशी करतना वेर्णा पुलिसांनी दिनेश कुमार भारतीय (46, उत्तर प्रदेश) आनी शिवनाथ मांझी (48, ओडिशा) ह्या दोगांक अटक केल्ली. सनी सिंग आनी दोगांय दुबावितां मदीं सोरो पिवपा वयल्यान सुरू जाल्लो वाद मारामारी मेरेन पावलो. दोनूय दुबावीत कामगारांनी मेल्ल्या मनशाचेर लांकडी बडयेन जिवघेणो हल्लो केलो आनी तातूंत ताका मरण आयलें. दक्षिण गोंय जिल्लो आनी सत्र न्यायालयाचे अतिरिक्त सत्र न्यायाधीश क्षमा जोशी हांणी ह्या प्रकरणाची सुनावणी केली. न्यायालयांत सादर केल्ल्या पुराव्या उपरांत आनी युक्तिवादांतल्यान दोनूय दुबावितांक दोशी थारायले. शुक्रारा जाल्ले सुनावणेंत दोनूय आरोपींक जल्मभर बंदखणीची ख्यास्त फर्मायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
