भांगरभूंय | प्रतिनिधी
उजो पालोवपी दळाची सोद मोहीम सुरू
वाळपय: पर्वरी (बेतीं) हांगासरलो शिवकुमार पवार (18) ह्या तरणाट्याक वेळगें सत्तरींतल्या न्हंयेच्या पात्रांत बुडून मरण आयलें. हो प्रकार काल (आयतारा) सांजवेळा घडलो. मयताची कूड अजून सांपडिल्ली ना. रातीं उसरां मेरेन वाळपय उजो पालोवपी दळा कडल्यान सोद मोहीम हातांत घेतिल्ली.
शिवकुमार पवार हाचे सयत ताचे कांय इश्ट वेळगें हांगासरलें न्हंयचेर न्हावपा खातीर आयिल्ले. न्हाता आसतना शिवकुमार पवार अचकीत बुडलो. ताका वाटावपाचो यत्न ताच्या इश्टांनी केलो. पूण ते अपेशी थारले. हे विशींची म्हायती वाळपयच्या उजो पालोवपी दळाक दिले उपरांत दळाचे जवान घडणूक थळार दाखल जाले.
रातीं उसरां मेरेन तांणी शिवकुमार पवार हाची कूड सोदपाचो यत्न केलो. पूण ते अपेशी थारले. रात जाल्ल्यान सोद मोहीम थांबयली. आयज (सोमारा) सकाळीं परतून एकदां सोद मोहीम हातांत घेतले अशी म्हायती उजो पालोवपी दळाच्या गोपांनी दिली. मजगतीं हे विशींची म्हायती मेळटकूच वाळपयचे पुलीस निरिक्षक दीपक गडेकार हांणी घडणूक थळार वचून परिस्थितीची पळोवणी केली.
हे विशीं अदीक म्हायती दितना तांणी सांगलें, तरणाटो हो पर्वरी हांगासरलो आसून तो आपल्या इश्टां सयत न्हावपा खातीर आयिल्लो. वेळगें सत्तरी हांगासरले न्हंयचेर न्हाता आसतना तो अचकीत बुडिल्ल्याची म्हायती मेळ्ळे उपरांत हे विशींची म्हायती उजो पालोवपी दळाक दिली अशें गडेकार हांणी सांगलें. हे विशींची फुडली चवकशी सुरू आसा. सोद मोहीम सोमारा परतून एकदां हातांत घेतले अशेंय तांणी सांगलें.
मजगतीं, आतांच पावस सुरू जाला. सत्तरी म्हालांतल्या न्हंयांनी आतांच उदकाचो प्रवाह सुरू जाला. न्हंयचेर न्हावपा खातीर आयिल्ल्या शिवकुमार पवार हाच्या रुपान म्हालांतलो पावसाच्या मोसमांत हो पयलो बळी थारिल्ल्यान लोकां मदीं दुख्खाची सया आनी भिरांतूय पातळ्ळ्या.
मेळिल्ले म्हायती प्रमाण शिवकुमार पवार हो पर्वरे हांगासरल्या हिरो शोरुमांत मॅकानीक म्हूण कामाक आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
