वेलींगकार खंय आसात, तें लोकांनीच पुलिसांक सांगचें : अालेक्स सिक्वेरा

भांगरभूंय | प्रतिनिधी

पणजी : प्रा. सुभाष वेलींगकार हांणी सेंट फ्रान्सीस झेवीयर हांचे विशीं जें उलोवप केलां ते विशीं तांचेर कारवायेची प्रक्रिया सुरू जाल्या. पुलीस तांचो सोद घेतात. प्रा. वेलींगकार खंय आसात, तें खबर आसा जाल्यार लोकांनी ताची म्हायती पुलिसांक दिवची, अशें पर्यावरण मंत्री अलेक्स सिक्वेरा हांणी सांगलें.

प्रुडंट मिडियाच्या हेड ऑन कार्यावळींत उलयतना तांणी असो उलो मारलो. प्रुडंट मिमियाचे संपादक संचालक प्रमोद आचार्य हांणी हेड ऑन कार्यावळींत तांची मुलाखत घेतली. सेंट फ्रान्सीस झेवीयर हांच्या डीएनएची तपासणी करची, हें जें उलोवप प्रा. वेलींगकार हांणी केलां तें गैर आसा. तांचेर कारवाय जावपाक जाय. कारवाय करपाची प्रक्रिया सरकारान सुरू केल्या. प्रा. वेलींगकार हांच्या उलोवपाचेर भाजपाचे क्रिस्तांव मंत्री, आमदार ओग्गी आसात, हो आरोप लेगीत तांणी न्हयकारलो. मडगांवां लोकांनी जेन्ना रास्ता रोको केल्लो, तेन्ना लोकांची समजूत काडपाक वचपाची म्हजी तयारी आशिल्ली. पुलिसांनी म्हाका आडायलो. पुलिसांनी आडायिल्ल्यान म्हाका वचप अशक्य जालें. तशेंच प्रा. वेलींगकार हांचेर कारवाय करची, अशी मागणी हांव शुक्रारा सावन करीत आसा, अशें तांणी सांगलें.

सेंट फ्रान्सीस झेवीयर हांचो डीएनए दर एकल्या गोंयकारां मदीं आसा, ह्या म्हज्या उतराचो लोकांनी अनर्थ केलो. फ्रान्सीस झेवीयर हाचो डीएनए दरेका गोंयकारां मदीं आसा, हाचो अर्थ दरेक गोंयकार फ्रान्सीस झेवीयर हांचो आदर करता. दरेक म्हयन्याक जे मीस जाता, ताका सगल्या धर्माचे लोक हाजीर आसतात. सेंट फ्रान्सीस झेवीयर हे फक्त क्रिस्तांव पुरतेच मर्यादीत नात अशें सिक्वेरा हांणी सांगलें.

गोंयकार जमनी विकतात म्हूण भायले लोक गोंयांत येतात आनी घरनिर्माण प्रकल्प जातात. बिगर गोंयकार चड पयशे दितात म्हूण गोंयकार लोक तांकां जमनी विकतात, अशें सिक्वेरा हांणी सांगलें. चार, पांच भाव आसतात. तांचे मदीं वाद आसता. हातूंतल्या पयशां खातीर ते बिगर गोंयकारांक जमनी विकतात. हातूंत फक्त सरकाराचो दोश ना अशें तांणी सांगलें. जमनीचें रुपांतरण हें आतांच जायना. हांव सगल्यांत पयलीं 1994 वर्सा आमदार जाल्लों तेन्ना लेगीत जमनीचें रुपांतरण जातालें, अशें पर्यावरण मंत्री अालेक्स सिक्वेरा हांणी सांगलें. पर्यावरण तशेंच शेत जमनी वाटावपाचे सरकाराचे यत्न सुरू आसात अशेंय तांणी म्हणलें.