भांगरभूंय | प्रतिनिधी
ड्रायव्हर सोरो पियेल्ल्याचो कामगारांचो दावो
मडगांव, प्रतिनिधी : वेर्णा उद्देगीक वसणुकेंत घडिल्ल्या अपघातांत बसीन चिडि्डल्ल्यान चार कामगारांक मरण. जाल्यार पांच जाण गंभीर जखमी जाले. मूळ बिहार हांगचे हे कामगार. ते रस्त्या कुशीक खोपींत न्हिदिल्ले कडेन तांकां बसीन चिडि्डले. ड्रायव्हर सोरो पियेल्लो असो दावो कामगारांनी केला.
मेळिल्ले म्हायती प्रमाण, वेर्णा उद्देगीक वसणुकेंत शेनवारा रातीं सुमार इकरा वरांचेर ही घडणूक घडली. आयडीसींतल्या रोझ बर्गर कंपनींतल्या कर्मचार्यांक घरा सोडपाक नेमिल्ल्या खाजगी बसचालकाचो वोल्तार गाडये वयल्या ताबो गेलो. वोल्तार चालकान बस वळोवंक ना आनी रस्त्या कुशीक आशिल्ल्या पत्र्यांच्या खोपींचेर व्हरून गाडी चडयली. हलतातूंत न्हिदिल्ले णव जाण गंभीर जखमी जाले. तिगांक जाग्यारूच मरण आयलें जाल्यार एकल्याक हॉस्पिटलांत व्हरतना मरण आयलें. आनीक पांच जाण गंभीर जखमी जाल्यात.
अपघाता उपरांत पुलिसांक आपयले. पंचनामो करून जखमींक उपचारा खातीर दक्षीण गोंय जिल्हो हॉस्पिटलांत व्हेले. जाल्यार मरण आयिल्ल्यांच्यो कुडी दक्षीण गोंय जिल्हो हॉस्पिटलाच्या मोर्गांत दवरल्यात. ह्या बस अपघातांत कंपनीच्या कांय कर्मचार्यांक तशेंच बसचालकाक दुखापत जाली.
ह्या अपघातांत वाटावल्ल्या कामागारांनी दिल्ले म्हायती प्रमाण, बसीन तीन खोंपी काबार केल्यो. तातूंत णव जाण न्हिदिल्ले आनी तांतल्या चार जाणांक मरण आयलें. महामार्गाच्या गटारांचेर स्लॅब घालपाचें काम हे कामगार करतात. ताका लागून ठेकेदारान तात्पुरत्यो शेडी उबारून दिल्ल्याचें तांणी सांगलें. अपघात केल्ल्या बसचालकान सोरो पियेल्लो. तशेंच अपघाता उपरांतूय सोरो पियेल्लो आनी हे विशीं कोणायकूय सांगल्यार मारपाचीय धमकी बस चालकान दिल्ली असो दावो कामगारांनी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
