भांगरभूंय | प्रतिनिधी
मडगाव : वेर्णाच्यान लोटले वचपी रस्त्याचेर अनवळखी वाहनान धपको दिल्ल्यान मिर्झापूर, उत्तरप्रदेशच्या ३० वर्सां पिरायेच्या तरणाट्याक ह्या अपघातांत मरण आयलें. मायणा-कुडतरी पुलिसांनी ह्या प्रकरणांत गुन्यांव नोंद करून दुबावीत गाडी चालकाक अटक केली.
हे विशीं मेळिल्ले चड म्हायती प्रमाण, उत्तरप्रदेश च्या ३० वर्सां पिरायेचो प्रमोद निषाद हो तरणाटो कामा निमतान गोंयांत आयिल्लो. दोन दिसां सावन तो कामाच्या निमतान भोंवतालो. मंगळारा सकाळीं ताची कूड वेर्णा-लोटली मार्गार मेळ्ळी. हे विशीं म्हायती मेळटांच मायणा-कुडतरी पुलीस घडणुके सुवातेर पावले.
रस्त्या कुशीकच्यान चलतना अनवळखी वाहनान निषाद हाका धपको दिलो आनी थंयच्यान पळ काडलो. अपघातांत जखमी निषाद हाका जाग्यारूच मरण आयलें. ही घडणूक सकाळीं सुमार सवायणवांक घडली. निषाद दोन दिसां आदीं नोकरी सोदपाक गोंयांत आयिल्लो मात अपघातांत ताका आपलो जीव वगडावचो पडलो.
मायणा-कुडतरी पुलिसांनी अपघाताची नोंद केल्या. मायणा-कुडतरी पुलिसांनी ह्या अपघाताची सीसीटीव्ही फुटेज आनी हेर पुराव्यांच्या आदारार दुबावीत गाडी चालकाक शिरोड्यां गाडी सयत ताब्यांत घेतलो.
मायणा-कुडतरी पुलिसांनी× ह्या प्रकरणांत ट्रकचालक विजय श्रेष्ठ (५१, रा. मुंबय) हाका अटक केली. मरण आयिल्ल्याची कूड दक्षीण गोंय जिल्लो हॉस्पिटलाच्या मोर्गांत धाडल्या. ह्या प्रकरणांत पुलीस उपनिरीक्षक आशुतोष नायक फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
