वेपाऱ्यांच्या हिता खातीर अध्यादेश जारी करात

भांगरभूंय | प्रतिनिधी

म्हापशें पालिका मार्केटांतल्या दुकानदारांची मागणी; उपसभापतीक भेटयलें निवेदन

म्हापशें: पालिकेच्या कारणां दाखय नोटिसीच्या निशेधार्थ मार्केटांतल्या सगल्या वेपाऱ्यांनी आपलीं दुकानां बंद दवरलीं. तशेंच वेपारी वर्गाच्या हिता खातीर सरकारान ताकतिकेन अध्यादेश जारी करून आमकां थाकाय दिवची अशी मागणी करून वेपारी संघटणेन उपसभापती ज्योशुआ डिसोझा हांकां निवेदन सादर केलें.

संघटणेचे अध्यक्ष श्रीपाद सावंत, सचीव सिध्देश रावत, उपाध्यक्ष आसीस कार्दोज, भांडारी जितेंद्र फळारी, रुपेश शिंदे, पांडुरंग सावंत, आशीश शिरोडकार हांच्या शिश्टमंडळान उपसभापतींक निवेदन सादर केलें. ह्या वेळार उपसभापती ज्योशुआ डिसोझा हांच्या घरा कडेन सुमार हजारभर वेपारी जमिल्ले. हे खातीर मंगळारा सकाळीं सगल्या वेपारी वर्गान आपलीं दुकानां बंद दवरिल्लीं. ताका लागून दनपार मेरेन दुकानां बंद आशिल्ल्यान बाजारपेठेंत शुकशुकाट पातळिल्लो.

पालिका मार्केटांत कांय भाडेकार दुकानदारांनी आपलीं दुकानां भायले भायर तिसऱ्या मनशाक सबलीज करून चलोवंक दिल्ले खातीर पालिकेन संबंदीत मूळ 311 दुकानदार भाडेकारांक कारणां दाखय नोटीस दिल्या. ह्या प्रकरणाची पालिका मुख्याधिकाऱ्यां मुखार सुनावणी सुरू आसा.

म्हापशें मार्केटांतल्या सबलीज प्रकरणा संबंदी उच्च न्यायालयांत जनहीत याचिका दाखल केल्या. हाचे विपरीत परिणाम मार्केट आनी वेपारी वर्गाक भोगचे पडटात. हातूंतल्यान एकूच मार्ग म्हणल्यार सरकारान अध्यादेश काडून पालिका कायद्यांत गरजेची ती दुरीस्ती करची. मुख्यमंत्री आनी शार उदरगत मंत्री हांचे हाचे कडेन लक्ष ओडून थळावे आमदार ह्या नात्यान हो विशय सरकारा कडेन मांडचो आनी रोखड्या रोखडो अध्यादेश काडपा खातीर यत्न करचो अशी मागणी वेपारी संघटणेन उपसभापतींक सादर केल्ल्या निवेदनांतल्यान केल्या.

म्हापशें वेपारी संघटणेचे सचीव सिद्धेश रावत हांणी म्हणलें, वेपारी वर्गाचेर आयिल्ल्या संकश्टा विशीं उसभापतींची भेट घेवन आमचे म्हणणें मांडलां. हो विशय आपूण सरकारा मुखार मांडटलों आनी आपले परीन गरजेचें तें सहकार्य करतलों अशें आस्वासन तांणी आमकां दिलां. हें प्रकरण न्यायप्रविश्ठ आशिल्ल्यान तें भौशीक रितीन कांयच उलोवंक शकना. पूण आपलो तेंको तांणी कळीत केला. तशेंच सरकार वेपाऱ्यांक ह्या कायद्याच्या कचाट्यांतल्यान सुखरूप भायर काडटलें असो विस्वास तांणी उक्तायलो.

वेपारी वर्ग कोवीड म्हामारींतल्यान भायर सरतात. सद्या वेपारी हे तणावा सयत लुकसाणांत आसात. अशा वेळार कायद्याची ही हुमकळटी तरसाद ह्या तणावांत भर घालता. चडसो वेपारी वर्ग 40 ते 60 पिराये गटांतलो आसा. फाल्यां खंयूय वचून ते काम करूंक शकनात. ताका लागून वेपाऱ्यांक भिरांत दाखोवन कुशीक उडोवपाचो यत्न थांबोवचाे. वेपारी वर्गाचे हीत सांबाळपा खातीर सरकारान गरजेचीं तीं पावलां उबारचीं अशी मागणी ह्या वेपाऱ्यांनी केली.

वेपारी वर्ग अर्थवेवस्थेचें एक रोद आसा. आमी कोणाचोच खून केल्लो ना. म्हापशें वेपाऱ्यां सयत गोंयांतले हेर वेपारी मेळून 1 लाख 20 हजार वेपाऱ्यांक ह्या याचिकेचो फटको बसला. ताका लागून सरकारान अध्यादेश जारी करून आमकां थाकाय दिवची अशी मागणी वेपाऱ्यांनी केली.

नगरपालिकांच्या मालकीच्या भाडेकार दुकानदारांनी भायले भायर आपलें दुकान सब लेट करून तिसऱ्याक विकिल्लें. सद्याच्या भाडेकाराच्या नांवान दुकान कबलातपत्राचें हस्तांतरण करपी अध्यादेश (ऑर्डिनन्स) फाटल्या 20 डिसेंबर 2020 दिसा सरकारान जारी केल्लो. हस्तांतरणा वेळार संबंदीत दुकानदारां कडल्यान प्रती चौ. 30 हजार रुपया शुल्क लेगीत पालिकांनी निश्चीत केल्लें. ही हस्तांतरण प्रक्रिया स म्हयन्याच्या कालावधी भितर पुराय करपाचो आदेश लेगीत सगल्या पालिकांक सरकारान दिल्लो. ते प्रमाण अशा भाडेकारांनी आपल्यो फायली गोंयांतल्या सगल्या पालिकां कडेन सुपूर्द केल्ल्यो. पूण सरकारान हो अध्यादेश म्हयन्या भितर फाटीं घेतिल्लो. तो मेरेन चडशा दुकानदारांनी आपल्यो फायली पालिकां कडेन सादर केल्ल्यो.

1977-78 वर्सा तेन्नाच्या नगरपालिका संचालकान दुकानां सब-लेट प्रकरणाची दखल घेवन संबंदीत भाडेकारांचेर कारवाय करपाचे निर्देश पालिकेक दिल्ले. ते प्रमाण पालिकेन ह्या दुकानदारांक कारणां दाखय नोटीस दिल्ली. तशेंच दुकान सब-लेट हस्तांतरण प्रक्रिया कार्यवाही जाले उपरांत रोखडेंच पालिका मुख्याधिकाऱ्यान अशा दुकानदारांचेर कारवाय कित्याक केली ना. हो प्रस्न फाटलीं 45 वर्सां रखडून कित्याक दवरलो असो प्रस्नूय दुकानदारांनी उपस्थीत केला.

प्रशास्त अशें म्हापशें पालिका मार्केट त्या वेळार काम्र द बार्देसचे (बार्देस नगरपालिका) वतीन पुर्तुगेज राजवटींत 1955-61 ह्या काळांत बांदिल्लें. आंगड हांगासरल्या अलंकार थिएटर वाठारांतलो पोरणो बाजार उणो पडत आशिल्ल्यान हें मार्केट उबें जालें आनी पोरण्या बाजारांतल्या वेपाऱ्यांक नवे सुवातेर स्थलांतर केलें. ह्या नव्या मार्केटा खातीर गोंयांतल्या त्या वेळा वयल्या एका व्हड खण उद्देजकान अर्थीक मजत केल्ली. हे मजती खातीर पुर्तुगेज राजवट आनी काम्र द बार्देसान त्या उद्देजकाक कांय दुकानां दिल्लीं. उपरांत ती दुकानां त्या उद्देजकान दुसऱ्यांक दिल्लीं.