भांगरभूंय | प्रतिनिधी
पणजी, प्रतिनिधी : म्हजे घरकान्नीक दक्षीण गोंयांत लोकसभे खातीर भाजपाची उमेदवार मेळटा तें म्हाका मिडीया कडल्यानूच कळ्ळां. वेचणुकेंक उबे रावप काय ना तो पल्लवी धेंपोचो विशय. हांवें ताचेर भाश्य करप योग्य न्हय. म्हजी घरकान्न सज्ञान आसा. आपले निर्णय ती स्वता घेतली, अशें पल्लवी हांचे घरकार उद्देगपती श्रीनिवास धेंपो हांणी स्पश्ट केलें.
दक्षिणेंत उमेदवारी खातीर भाजपांत सध्या चडाओढ चल्ल्या. दक्षिणेंत बायल उमेदवारुच जाय अशी वयल्यान सुचोवणी आयल्या. हे फाटभुयेंर श्रीनिवास धेंपो हांची घरकान्न पल्लवी धेंपो हांचें नांव दक्षीण गोंयचे भाजपा उमेदवारी खातीर दोन दिसां पयलीं फुडें आयलां. हाचेर श्रीनिवास हांणी स्पश्टीकरण दिलें.
तिकेटीची आॅफर म्हाका येवंकना, म्हजे घरकान्नी आयल्या आसतली. म्हजी घरकान्न समजुदार आनी सज्ञान. वेचणुकेंक रावप काय ना तो तिचो निर्णय. उमेदवारी विशीं पल्लवी हिका अधिकृत फोन बी आयला जाल्यार म्हाका कल्पना ना, अशेंय तांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
