भांगरभूंय | प्रतिनिधी
मडगांव, प्रतिनिधी : वेंचणुकेच्या काळांत पुलीस वा भरारी पंगडांनी जप्त केल्ल्या पयश्या विशींच्या प्रकरणांतल्यो कागाळी सोडोवपा खातीर दक्षीण गोंय जिल्होधिकारी तशेंच वेंचणूक अधिकारी हांचे कडल्यान तीन वांगडी समितीची स्थापना केली.
दक्षीण गोंय जिल्होधिकारी तशेंच जिल्हो वेंचणूक अधिकारी अश्वीन चंद्रू ए. हांणी काडिल्ल्या आदेशा प्रमाण तांचे अध्यक्षते खाला तीन वांगडी समिती स्थापन केल्या. हातूंत जिल्हो ग्रामीण विकास यंत्रणेची प्रकल्प संचालक दिपाली नायक, पणजी वीज विभागाचे लेखा संचालक, मुखेल वीज अभियंता वॉल्टर एम. डिमेलो आनी लेखा उपसंचालक चेतन सी धरणगुट्टी हांची वांगडी म्हणून नेमणूक जाल्या.
केंद्रीय वेंचणूक आयोगान दिल्ले म्हायती प्रमाण जनतेची गैरवेवस्था जावची न्हय आनी तांच्यो कागाळी सोडोवपाक जिल्होधिकार्यांचे अध्यक्षते खाला समिती योग्य तपासणी करतली.
ही समिती वेंचणूक प्रक्रिये मजगतीं गरज पडल्यार बसकाय घेतली. पुलीस वा स्टॅटिक सर्व्हिलन्स टीम वा फ्लाइंग स्क्वॉड हांणी केल्ले जप्तीच्या दरेका प्रकरणाची आनी जंय जप्ती आड खंयचीय एफआयआर, कागाळ दाखल करूंक ना वा जंय जप्ती जावंक ना अशे समितीक कळ्ळ्यार थंय ती समिती वचून स्वता तपासणी करतली. ही समिती सगळे तरेच्या प्रकरणांची चवकशी करतली आनी जप्तीचो निर्णय घेतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
