भांगरभूंय | प्रतिनिधी
एसटी समाजाचे उदरगती खातीर व्हिजन डॉक्युमेंट
पणजी : हांव गोविंद गावडे, गणेश गांवकार तशेंच प्रकाश वेळीप हे एसटी समाजाचे फुडारी फकत वेंचणुके खातीर एकठांय येवंक नात, जाल्यार समाजाचें हीत तशेंच उदरगती खातीर एकठांय आयल्यात. हांव आनी गोविंद गावडे तशेंच हांव आनी प्रकाश वेळीप हांचे मदीं आतां कसलेच मतभेद नात. एसटी समाजाचे सगळे फुडारी प्रेरणा दिसाचे कार्यावळींत एके माचयेर आसतले, अशें आदिवासी कल्याण खात्याचे मंत्री रमेश तवडकार हांणी सांगलें.
सर्गेस्त मंगेश गांवकार आनी दिलीप वेळीप हांचे यादीक लागून अंदूची प्रेरणा दिसाची कार्यावळ २५ मेयाक आंबावली, केपें हांगा जातली. दिसभर विवीध कार्यावळी जातल्यो. आदिवासी कल्याण खात्याचे मंत्री रमेश तवडकार हांणी पत्रकार परिशदेंत ही म्हायती दिली. ह्या वेळार आयोजन समितीचे अध्यक्ष आनी आदले मंत्री प्रकाश वेळीप, एसटी म्हामंडळाचे अध्यक्ष वासुदेव गावकार आनी हेर फुडारी हाजीर आशिल्ले.
राज्यांत एसटी तशेंच आदिवासी समाजाचें प्रमाण ३० टक्के आसा. आमच्या मदल्या मतभेदांक लागून समाजाचें बरेंच लुकसाण जालां. पयलींचो इतिहास परत खणून काडिनासताना आतां समाजा खातीर एकठांय रावून वावर करपाचो निर्णय आमी घेतला. डॉ. काशिनाथ जल्मी, प्रकाश वेळीप ह्या फुडार्यांनी समाजा खातीर बरोच वावर केला. आतां गोविंद गावडे, वासुदेव गांवकार तशेंच हांव वावर करतां, अशें रमेश तवडकार हांणी सांगलें. आमदार आंतोन वाज हे कांय कामाक लागून प्रेरणा दिसाचे कार्यावळीक हाजीर रावचे नात.
प्रेरणा दिसा निमतान अटल आसराच्या लावार्थ्यांक धनादेश तशेंच रानां हक्कांच्या सनदींचे वांटप जातलें. एसटी तशेंच आदिवासी समाजाची उदरगत तशेंच कल्याणाचो विचार करून फुडल्या १० वर्सां खातीर करपी कार्यावळींचो व्हिजन डॉक्युमेंट तयार केला. ह्या व्हिजन डॉक्युमेंटाचें प्रकाशन कार्यावळीत जातलें. तशेंच डॉ. मधू घोडकिरेकार, शशिकांत गांवकार, धाकू मडकयकार, रोमाल्डो गोन्स्लावीस हांकां प्रज्ञावंत पुरस्कारांचे वांटप जातलें.
पंचायतींनी जातली सुविधा केंद्रां
जे पंचायतींनी ३५ टक्यां परस चड एसटी समाजाचे लोक रावतात त्या पंचायतींनी सुविधा केंद्रां स्थापन जातली. एसटी समाजा खातीर आशिल्ल्यो येवजण्यो तशेच हेर सुविदांची म्हायती दिवपा खातीर हेर सुविधा केंद्रां आसतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
