भांगरभूंय | प्रतिनिधी
पणजी: लोकसभा वेंचणुकेच्या प्रचाराच्या धुमशेणांतूच मुख्यमंत्री डॉ. प्रमोद सावंत हांणी बुधवारा आपलो वाडदीस मनयलो. तांकां प्रधानमंत्री नरेंद्र मोदी हांचे सयत खूबशा मानेस्तांनी समाज माध्यमांतल्यान शुभेत्सा दिल्यो. तशेंच तांच्या सांखळेच्या घरा कडेन, मडगांव भाजप कचेरी, सरकारी निवासस्थानार शुभेत्सा दिवपा खातीर लोकांची रांग लागिल्ली. तशेंच मुख्यमंत्र्यानी वाडदिसा निमतान विवीध धर्मीक विधीय केले.
मुख्यमंत्र्याच्या वाडदिसाची सुरवात मंगळारा मध्यान रातीं 12 वरांचेर जाली. फोंडेंच्या भाजप कार्यकर्त्यांनी मध्यान रातीं केक कापून मुख्यमंत्र्याचो वाडदीस मनयलो. सकाळीं 8 ते 9 मजगतीं तांच्या सांखळी हांगासरल्या घरा मेळपा खातीर वेळ दवरिल्लो. थंय शुभेत्सा दिवप्यांची गर्दी जाल्ली. तशेंच दनपारां 1 ते 3 मजगतीं पणजेंतल्या सरकारी निवासस्थानार लेगीत मुख्यमंत्र्याक शुभेत्सा दिवप्यांची गर्दी जाल्ली.
मुख्यमंत्र्यांनी सकाळीं कुलदेवता सांतेरी प्रसन्न तशेंच कोठंबे चंद्रेश्वर देवस्थानार पुजा केली. राज्यांत शांती, भरभराट येवची अशी प्रार्थना तांणी देवा कडेन केली.
मजगतीं, प्रधानमंत्री नरेंद्र मोदी हांणी ट्विटरा वरवीं मुख्यमंत्र्यांक शुभेत्सा दिल्यो. तांणी म्हणलें, मुख्यमंत्री डॉ. प्रमोद सावंत हांकां वाडदिसाच्यो शुभेत्सा. ते गोंयाक बदलपा खातीर आनी थंयच्या लोकांच्यो इत्सा पुराय करपा खातीर बरे यत्न करीत आसात. हाचेर मुख्यमंत्र्यांनी प्रधानमंत्र्याचें उपकार मानले.
तशेंच मुख्यमंत्र्यांक गृह मंत्री अमीत शाह, रस्तो आनी म्हामार्ग मंत्री नितीन गडकरी हांचे सयत विवीध केंद्रीय मंत्री, हेर राज्याचे मुख्यमंत्री हांणी शुभेत्सा दिल्यो. गोंयचे मंत्री, आमदार तशेंच विवीध थरांतल्या लोकांनी मुख्यमंत्र्याक मेळून तांकां शुभेत्सा दिल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
