भांगरभूंय | प्रतिनिधी
वाळपय: लोकसभा वेंचणुकेचे फाटभुंयेर गोंय, कर्नाटक हांचें मजगतीं केरी सत्तरी हांगासरल्या नाक्यार अबकारी खात्या कडल्यान वाहनांची तपासणी सुरू केल्या. गोंयच्यान कर्नाटकांत बेकायदो सोऱ्याची येरादारी जावची न्हय हे खातीर खबरदारी घेतल्या. अशे तरेची वाहनां सांपडल्यार तांचेर खर कारवाय करतले. फाटल्या आठ दिसा सावन हे तपासणेक सुरवात जाल्या. लोकसभा वेंचणूक जाय मेरेन ही प्रक्रिया सुरूच उरतली अशें अधिकाऱ्यांनी स्पश्ट केलें.
गोंयच्यान कर्नाटकांतल्या बेळगांवां वचपा खातीर केरी मार्गान चोर्ला ह्या रस्त्या वेल्यान व्हड प्रमाणांत वाहनांची येरादारी जायत आसता. प्रवासी येरादारी तेच प्रमाण म्हालाची येरादारी ह्याच मार्गान जायत आशिल्ल्यान सेगीत ह्या रस्त्यार वाहनांची गर्दी आसता.
लोकसभा वेंचणूक जाहीर जाल्या. 7 मे दिसा गोंयांतल्या दोनूय मतदारसंघां खातीर मतदान घेतले. वेंचणूक आयोगाच्या मार्गदर्शक तत्वांची अंमलबजावणी करपाच्या उद्देशान ही तपासणी हातांत घेतल्या. दर वाहनांची खर तापसणी करतात. हे खातीर अबकारी खात्याच्या वाळपय विभागा वतीन तपासणी कर्मचाऱ्यांची वेवस्था केल्या. 24 वरां ह्या वाहनांची तपासणी करतात. गोंयच्यान कर्नाटकांत वचपी दरेक वाहनांची तपासणी करीत आशिल्ल्याचें अधिकाऱ्यांनी स्पश्ट केलें. कारण गोंयच्या सोऱ्याक कर्नाटक आनी महाराष्ट्रांत मोटी मागणी आसा. ताका लागून सेगीत गोंयचो सोरो लिपचोरयां कर्नाटक आनी महाराष्ट्रांत व्हरतात.
हे खातीर केरी हांगा तपासणी नाक्यार तपासणी प्रक्रिया हातांत घेतिल्ल्याचें ह्या वेळार अधिकाऱ्यांनी सांगलें. तांणी दिल्ले म्हायती प्रमाण सद्या तरी अशे तरेचीं वाहनां सांपडिल्ली नात. लिपचोरयां पद्दतीन सोऱ्याची येरादारी जायत आशिल्ल्याचें स्पश्ट जाल्लें ना. पूण तपासणी प्रक्रिया खरपणान हातांत घेतल्या. हाका लागून गोंयच्यान खंयचेय परिस्थितींत अशे तरेची येरादारी करची न्हय जेणेकरून तांचेर खर कारवाय करची पडुये अशे तरेची शिटकावणी अधिकाऱ्यांनी दिल्या.
सत्तरी म्हालाचे वेंचणूक अधिकारी उपजिल्होधिकारी निलेश धायमोडकार हांणी हे संबंदीचे निर्देश दिल्यात. वेंचणूक कायद्याच्या खंयच्याय पांवड्यार भंग जावचो ना हाची खाशेली दखल घेवपाचे निर्देश तांणी दिल्यात. सद्या आचारसंहिता सुरू आसा. हाका लागून आचारसंहितेचो भंग जावचो ना हाची दखल दरेकान घेवची अशी विनंती उपजिल्होधिकाऱ्यान केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
