भांगरभूंय | प्रतिनिधी
गोंयची उदरगत सुपुल्लें राज्य आसूनय फाटल्या धा वर्सांनी फुडाराचेर नदर दवरुन जाल्या. गोंय देसांतले उद्येगपती, उद्येजक, वेपारी, वेवसाय करतल्यांक, कामगारांक भावता. राज्यांतल्या मुळाव्या उद्येगपतींची दुसरी पिळगी, युवा उद्येजक राज्या भायर प्रकल्पांचीं कंत्राटां मेळयतात, उद्येग उबारतात. फाटल्या धा वर्सांतले हे व्हड बदल समजून घेवन सरकार लागीं आयिल्ले विधानसभा वेंचणुकेचे तयारेक लागलां. विरोधी मुखेल तशेंच प्रादेशिक राजकी पक्ष आयजय विखुरिल्ले आसात. विखुरिल्ल्या विरोधकांचो एकवट जावचे आदींच वेंचणुको जातल्यो.
मतदार शिकल्यात, तांकांय बरें वायट कळटा. चड तेंप सत्तेर उरिल्ले आमदार, मुख्यमंत्री सांगात्यांक सत्तेची वाट दाखयना जाल्यार तांकां आड घालपाचो वावर तांचे लागींचेच करतात. राजकारणाक वेवसायाचें रुप येता तेन्ना सोंपिल्लो आतंकवाद वयर सरता. राजकारण आयज 365 दिसांचें जाता, हें फुडारांत राजकारणात येवंक सोदतल्यांनी घट मतींत दवरचें.
विधानसभा वेंचणूक लागीं आयिल्ल्यान राज्यांतले राजकारण तापतना, धांवतना न्हिदिल्ल्यांक जाग येवपाक लागल्या. सगल्या राजकी पक्षांनी वचपी, नवीं इक्वेशनां करपी गोंय ते दिल्ली मेरेन भोंवतले. दोन वर्सां जिल्लो, नगरपालिका, पंचायत पावंड्यार वावुरप्यांक, मतदारांक वर्साक एकदां तोंड दाखयतल्यांक मतदार येवकार दितले. मतदारांनी देस पावंड्या वयलें राजकारण शिकल्यार मतदान कोणाक करप तें तांकां कळटलें.
देसांतले राजकारण विंगड- विंगड मार्ग, राज्यांतल्यान परतून एकदां तिसरे राजकी शक्तीचे बांदावळी कडेन धांवता. तिसरी शक्ती कोणाक लाव मेळोवन दितली तें मतदारांक कळपाची गरज आसा. राज्यांत वगतार दुसऱ्या नेतृत्वाक, पुतांक, धुवांक, सुनांक मुख्यमंत्रीपद दिल्यार सरकार तिगूंक शकता. राजकारणांत एकाच घराब्याचीं अती जाल्लीं मुळां राज्य, देस पावंड्यार मतदार चड तेंप सोंसून घेनात, हें अस्तंत बंगालांतलें राजकारण शिकयता. राज्यांत सत्ता वगडायतना खासदार जावपाचीं सपनां पळोवपी वाडत आसात. वावराचे मोलावणेंतल्यान खासदार पदा मेरेन वचूंक मेळटा.
प्रधानमंत्री नरेंद्र मोदी हांणी बारा वर्सां वयर दिल्ली राजकी थिराय सरकारांतल्या आदल्या सांगात्यांक एकठांय हाडटली अशें दिसूंक लागलां. आदले संरक्षणमंत्री मनोहर पर्रीकार हांणी श्री. मोदी हांकां प्रधानमंत्री म्हणून मुखार हाडपाक तेंको दिल्लो. फुडाराचें गिन्यान तांकां आशिल्ल्यान तेन्नाचो निर्णय अचूक म्हणप समा जातलें. ‘मर्जर, डिफेक्शन्स,’चें देस पावंड्या वयलें राजकारण नित्याचें जाता तेन्ना गोंय फाटीं उरतलें? डिफेक्टरांक वेंचून दिवचें न्हय अशें मतदारांक आड्डून सांगपी कितले आसात? आयज केपेंचो आमदार भाजपात वता, फाल्यां आम आदमी पार्टेचो आमदारय वचूंक शकता, रिव्होल्युशनरी गोवन्साचो आमदार विरेश बोरकार पक्ष सोडटलो, म. गो. आमदार जीत आरोलकार भाजपांत वचपाक तयार अशो खबरो व्हायरल जातात. आमदार, राजकारण्यांचे चलणुकेंतल्यान तें कळटा. वेंचणूक लागीं पाविल्ल्यान फांतोडेर, मध्यानराती भाजपांत वचपाक हेर राजकी पक्षाच्या आमदारां मदीं व्हडली सर्त लागल्यार अजाप जावचें न्हय. राजकारणाची दारां तरणाट्यांक आपयतात, जल्ले पार्टीचेय बॅनर्स शारांनी लागल्यात. रातयां बॅनर्सांचीच न्हय राजकी पक्षाची बांदावळ जातली. पावसांतल्या अळम्यांवरी राजकारणी, कंत्राटदार, विदेशी वेंचणुकेच्या तेंपार येतले. ल्हान राश्ट्रीय पक्षाच्या मुखेल्यांक, फुडाऱ्यांक गोंयां आत्र्या पयऱ्यान येवचें दिसतलें. राज्यांत थळावे प्रतिनिधी उरतले, तांकां राज्याचो कोनसो- कोनसो खबर आसपाची गरज आसा. वेंचणुके वेळार राज्याच्या कोनश्या इतलेंच मतदाराचें मन मतदाना आदीं दोन- तीन दीस बदलूंक शकता, ही जाणवीकाय राजकारण्यांक जाल्या.
वेंचणूक लागीं येतना आवाज वाडटलो, हें जातलें, तें येतलें अशें सांगपी आसतले. दिल्ल्या उतरांक पाळो दिवपाची तांक मतदारांनी जोखची पडटली. आम आदमी पार्टीन फकत सान्न रस्त्यांनी मारिल्ली, कोयर वेवस्थापना विशीं सरकाराक जागयिल्लें जाल्यार पार्टी मतदारांची मनां जिखपाची. आम आदमी पार्टेंतल्यान अध्यक्ष अमीत पालेकार कित्याक भायर सरले? देस पावंड्यार आम आदमी पार्टी फकत हावेसाक लागून तुटपाक पावल्या? पार्टी सोडटल्यांक तत्व ना? आम आदमी पार्टी नवे उमेदीन 2029 वर्सा प्रधानमंत्री मोदी हांच्या सरकारा आड वेंचणुकेंत देंवपाची तयारी करता. आम आदमी पार्टेचे मुखेली, दिल्लीचे आदले मुख्यमंत्री अरविंद केजरीवाल हांकां लोकसभा, राज्यसभेंत वचून सरकारा आड झगडपाची तांक आसा. फाटली वेंचणूक जिखून श्री. केजरीवाल, अस्तंत बंगालाची आदली मुख्यमंत्री ममता बॅनर्जी लोकसभेंत पावपाचीं. दोगांय आयज एकेच स्थितींत आसात. सत्तेंत नाशिल्ल्यान दोगांकय समेस्त जावन चिंतचें पडटलें, ‘सान्न गली गली में’ भोंवडायल्यार जैत लागीं येतलें. केन्ना? रोखडें न्हय, पांच ते धा वर्सांनी.
प्रधानमंत्री आर्टिफिशल इंटेलिजन्साचो उपेग समाजीक आव्हानां पयसावपाक करुंक सांगतात. एआय तल्यान समाजाक जागोवपाक जी म्हायती मेळटली ती अचूक आसपाची जतनाय घेवची पडटली. मेळिल्ली म्हायती कुशळतायेच्या अधिकारांत हाडप, अकुशळांक कुळशटायेंत हाडपाचें आव्हान आसा. ते खातीर म्हायती आनी प्रसारण मंत्रालय घटमूट करुन खात्याचो पावंडो उंचायेर व्हरपाची गरज उपरासल्या. दुसरीं मंत्रालयां नाशिल्ल्या केंद्रीय मंत्र्यांक म्हायती आनी प्रसारण मंत्रालय दिवपाक जाय. म्हायती मंत्रालय अती फिल्मी जाता, फिल्मांतल्यान समाज सुदारप शक्य आसा. सोरो, सिगार भलायकेक जांच करपी, मरण लागीं हाडपी अशें सांगपी फिल्मां सोरो, सिगारांतल्यान पयस दवरप गरजेचीं. शांतीकाय जाय हें खरें. फिल्मांतल्यान ते विशीं लोकांक जागयतना तंटे, झगडीं, तरसादी, बंदुकांचो उणो उपेग जावचो.
गरिबी उणी जाली, नवे गरीब नात? झुजाची तरसाद हुमकळत दवरतना झुजांतल्यान हवामान (क्लायमेट) बदलता, काळीं कुपां तांबशीं जातात. वेधशाळेक तें कळटा? वेधशाळेचे अदमास मान्सूनान चुकयले, अधिक म्हयनो ऐन पावसार आयला तें वेधशाळेक कळ्ळां? अमास, पुनवेंतलें विज्ञान मळब, दर्या सदां पळेल्यार कळटा. मीर्ग लागीं आयला त्या नक्षत्रार उटंगाराचो पावस पडटलो?
गोंयांवरी राज्यांत आयजूय पाचवोताल्ल सैम, दोंगर, दोंगुल्ल्यो, दर्या आसा. ती सैमीक आस्पत पावसाक बरी. पावसाचें उदक सांठोवपाच्यो, म्हेळें उदक तंत्रगिन्यानांतल्यान रिसायकल करपाच्यो येवजण्यो जाय. गाडयो, भौशीक वाठारांच्या नितळसाणीक रिसायकल्ड उदकाचो उपेग करचो. पावसार आयिल्लो अधिक म्हयनो दुकळ हाडपी आसचो न्हय हे खातीर झुज थोडो तेंप थांबता. गरज आसा तें पुरायपणान थांबोवपाची, झुजांत जावपी मनीसबळाचें लुकसाण दुख दिवपी. हवामानाक, वेंचणुकेंच्या फुडाराक म्हारग.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
