भांगरभूंय | प्रतिनिधी
भांगरभूंय । प्रतिनिधी
पणजीः लायटीच्या स्मार्ट मिटरावेल्यान भाजप प्रदेशाध्यक्ष दामू नायक हांणी वीज खात्याक वडीर काडल्या. वीज खात्यान केल्ल्या घोळाक लागून हो सगळो बोवाळ जाला आनी खातें स्मार्ट मिटरा विशीं लोकांक जागृत करपाक अपेसी थारला. ह्या कारणाक लागून मुख्यमंत्री डॉ. प्रमोद सांवत हांका हस्तक्षेप करचो पडलो, अशीं टीका नायक हांणी केल्या.
स्मार्ट मिटरा विशीं जे कोफुसांव चलताले तातूंत पक्षाचे लक्ष लागून आशिल्ले, अशें नायक हांणी आपली प्रतिक्रीया दितना सांगलें.
काय गजालीं खातीर जागृताय करप गरजेचे आनी हे करपांत खातें कमी पडलें. देखून मुख्यमंत्र्यान जो हस्तक्षेप करपाक जाय तो केल्लो आसा. वीज खात्यान लोकां मदीं वचून जागृताय करपाची गरज आशिल्ली. आपूण जावन दखल घेवन वाडीव बीला काडप हे बरोबर न्हय, अशें नायक हांणी म्हणलें.
25-30 वर्सा पयली गरजो कमी आशिल्ल्यो आनी त्या वेळार घरात फेर्रा, गीजर, एसी, चार-चार टीव्ही नाशिल्ल्यो देखून त्या वेळार लोकांनी कमी लोड मागून मीटराक अर्ज केल्ले. पूण उपरांत एसी बसयलो म्हूण लोड वाडटलो हे साद्या मनशाक खबर नासता. पूण हे विशीं वेळावेळार घरांनी भेट दिवन लोकांक लोड वाडोवपा खातीर अर्ज करपाक जाय म्हूण सांगपाक जाय आसले. हे सगळे करपाक खातें कमी पडला, असो आरोप नायक हांणी केलो.
लायटीची कोणूच चोरी करना. जी लायट वापरता तितलेच ताका बिल येता आनी त्या बिलांत मनीस खोशी आसा. हे विशीं ज्यो गजाली कमी पडल्या त्यो सरकारान मान्य केल्या, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
