भांगरभूंय | प्रतिनिधी
दामू नायक : स्वेच्छा दखल घेवन वाडीव बिलां काडप बरोबर न्हय
भांगरभूंय । प्रतिनिधी
पणजी : लायटीच्या स्मार्ट मिटरा वयल्यान भाजप प्रदेशाध्यक्ष दामू नायक हांणी वीज खात्याक वडीर काडला. वीज खात्यान केल्ल्या घोळाक लागून हो सगलो बोवाळ जाला आनी खातें स्मार्ट मिटरा विशीं लोकांक जागृत करपाक अपेशी थारलां. ह्या कारणांक लागून मुख्यमंत्री डॉ. प्रमोद सांवत हांकां हस्तक्षेप करचो पडलो, अशें तांणी सांगलें.
स्मार्ट मिटरा विशीं जें कोंफुसांव चलतालें तातूंत पक्षाचें लक्ष आशिल्लें, अशें नायक हांणी आपली प्रतिक्रीया दितना सांगलें.
कांय गजालीं खातीर जागृताय जावप गरजेचें आनी हें करपाक खातें उणें पडलें. देखून मुख्यमंत्र्यान जो हस्तक्षेप करपाक जाय तो केला. वीज खात्यान लोकां मदीं वचून जागृताय करपाची गरज आशिल्ली. स्वेच्छा दखल घेवन वाडीव बिलां काडप हें बरोबर न्हय, अशें नायक हांणी म्हणले.
25- 30 वर्सां पयलीं गरजो उण्यो आशिल्ल्यो आनी त्या काळार घरांत फेर्रां, गिझर, एसी, चार- चार टीव्ही नाशिल्ल्यो, देखून तेन्ना लोकांनी कमी लोड मागून मिटराक अर्ज केल्ले. पूण उपरांत एसी बसयलो म्हूण लोड वाडटलो हें सामान्य मनशाक खबर नासता. पूण हे विशीं वेळावेळार घरांनी भेट दिवन लोकांक लोड वाडोवपा खातीर अर्ज करपाक जाय म्हूण सांगपाक जाय आसलें. हें सगलें करपाक खातें उणें पडलां, असो आरोप नायक हांणी केलो. लायटीची कोणूच चोरी करना. जी लायट वापरता तितलेंच ताका बील येता आनी त्या बिलांत मनीस खोशी आसा. हे विशीं ज्यो गजाली उण्यो पडल्यात त्यो सरकारान मान्य केल्यात, अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
