भांगरभूंय | प्रतिनिधी
हरमल, बातमीदार: फाटल्या दोन दिसां सावन फांतोडेर चार वरांचेर लायट गेल्ल्यान गरमेन जीव कासावीस जाता. ताका लागून हरमलच्या लोकांनी वीज खात्याच्या कामाचेर तिडक उक्तायल्या.
परवां २८ एप्रिलाक सकाळीं ४ ते सकाळीं ७.३० वरां मेरेन वट्ट चार वरां वीज नाशिल्ली. हे विशीं वीज खात्यान कळयल्लें जाल्यार त्रास उणे जावपाचे. मात लायट वचपाची नोटीस सकाळीं मेळिल्ल्यान नागरिकांनी खात्याच्या कारभाराचो निशेध केला. काल २९ एप्रिलाक फांतोडेर ४ ते ५ वरां मेरेन फकत धा मिनटांच लायट आशिल्ली.
ह्या वाठारांत फाटले दोन दीस २८ आनी २९ एप्रिलाक वीज पुरवण खात्याच्या अधिकार्यांनी सुचवणी दिनासतनाच लायट उडयली. मात सोमारा २९ एप्रिलाक खात्यान पयलींच शटडावनची नोटीस दिल्ली. म्हळ्यार अकस्मात आनी नियोजीत तरेन वीज पुरवण खंडीत करून नेमकें खंयच्या भागान काम चल्लां? असो प्रस्न गिरायकांक पडला.
वीज खात्यान एका दिसा पयलीं वीज आसची हाची सुचवणी दिवची अशें कांय गिरायकांचें म्हणणें. रातची लायट उडयल्यार न्हिद मोडपा वांगडा टिफन, डबो तयार करपाक बायलांक बरेच त्रास सोंसचे पडटात.
मजगतीं,वीज खात्याचे अभियत्या कडेन संपर्क केलो तेन्ना, २९ एप्रिलाक सकाळीं फिडरांत अचकीत इबाड आयिल्ल्यान गिरायकांक त्रास सोंसचे पडले. मात पयलीच सुचवण्यो दिवन खातीं दुरुस्तीचीं कामा करतात अशें तांणी सांगलें.
गिरायकांक गृहीत धरून काम करिनासतना, गिरायकांक पयलींच कल्पना दिवन गिरायकांक शिटकावचें अशी मागणी गिरायकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
