विस्कळीत फुडारी, वावुरप्यांक एकठांय हाडले बगर….

भांगरभूंय | प्रतिनिधी

भाजपांत असंतुश्ट व्यक्ती आसात, तेच प्रमाण काँग्रेस पक्षांतय असंतुश्ट आसात. कोणेंच तांचे कडेन संपर्क सादिल्लो ना वा तांकां विस्वासांतूय घेतिल्ले नात.

राजकी खबरांपत्र 

काणकोणचे आमदार आनी सभापती रमेश तवडकार हांणी भाजपाची दक्षीण गोंयची उमेदवार पल्लवी धेंपो हांकां काणकोणांत उणींच 10 हजार मतांनी आघाडी मेळटली, अशें जाहीर केलां, जाल्यार काणकोणचे नगराध्यक्ष रमाकांत नायक गांवकार हांणी दरेके वेंचणुकेंत पालिका क्षेत्रांत भाजपाकूच आघाडी मेळ्ळ्या, अशें सांगून अंदूंचे लोकसभा वेंचणुकेंत पालिका वाठारांतूच 2500 मतांची आघाडी खंयचेय परिस्थितींत मेळटली, अशें जाहीर केलां. म्हणल्यार एका काणकोण मतदारसंघांतूच भाजपाक (पल्लवी धेंपोंक) कांय न्हय करून 12,500 हजार मतांची आघाडी मेळटली, असो ताचो अर्थ.

काणकोण तालुक्यांत वट्ट 34,358 मतदार. तातूंतले पालिका वाठारांत 10,293 मतदार आसात. 59 बूथ आसात. भाजपा हो देशांतलो असो एकूच पक्ष, जो वेंचणूक लागीं पावतकच केन्नाच कामांक लागना, तर तो आपल्या वावुरप्यांक वर्सांतल्यान 365 दिसूय कामाक लायता, तांकां सदांच कार्य करपाक उर्बा दिता. ताका लागून पक्षाच्या आमदारांक, वरिश्ठांक दक्षीण गोंयची सुवात कांय न्हय करून सोंपेपणी मेळटली, अशें दिसप सभावीक. मात, फाटले विधानसभा वेंचणुकेंत भाजपाचे कुशींतले आनी हाचे पयलीं भाजपाचे सत्तेचीं गोड- गोड फळां चाखिल्ले दोन उमेदवार वेंचणुकेंत उबे राविल्ले. तांणी आपलें नशीब तपासून पळयिल्लें. तातूंत आदले आमदार विजय पै खोत आनी आदले मंत्री इजिदोर फर्नाडीस हांणी भाजपाचे अधिकृत उमेदवार रमेश तवडकार हांचे आड वेंचणूक लढोवन भाजपाचीं 10,803 मतां मेळ्ळीं. ताकाच लागून भाजपाच्या रमेश तवडकार हांकां 9063 मतां मेळ्ळीं आनी फकत 30 टक्के मतांचेर तांकां समाधान मानचें पडलें. 

पंचायत आनी नगरपालिका वेंचणुकांनी व्हड प्रमाणांत मतदान जाता, पूण विधानसभा वा लोकसभा वेंचणुकांनी हें चित्र दिसना. लोकसभा वेंचणुकेंत मतदानाची टक्केवारीय विधानसभा वेंचणुके परस मात्शी उणी आसता.

सध्या दक्षीण गोंयांत आर.जी.पी.चे रुबर्ट पेरेरा, काँग्रेसीचे कॅप्टन विरियातो फर्नाडीस आनी भाजपाची पल्लवी धेंपो हे उमेदवार आसात. रुबर्ट परेरा हांणी काणकोणां येवन कांय सुवातींनी मतदारांक मेळपाचो यत्न केला. आतां मेरेन काँग्रेसीचे विरियातो फर्नाडीस हांणी उमेदवारी जाहीर जावचे पयलीं आनी उपरांत 7 फावटीं काणकोणच्या वेगवेगळ्या वाठारांनी भोंवडी केल्या. पूण तांकां आतां मेरेन प्रचारांत भाजपाचो हात धरपाक मेळूंक ना. भाजपाच्या 59 बूथांचेर सक्षम बूथ पद्दत, शक्ती प्रमुख आसात आनी आतां तांणी ‘पन्ना प्रमुख’य वेंचून काडल्यात. एका पन्ना प्रमुखान मतदार वळेरेच्या एका पाना वयल्या फकत 30 मतदारांचेर पूर्ण लक्ष केंद्रीत करपाचें आनी ह्या मतदारांक मनोवन चडांत चड 20 तरी मतां मेळूंक शकतात अशे तरेन काम करपाचें. तांकां ते परद्दतीन तयार केल्यात. वरिश्ठांनी मतदारांक आपले वटेन ओडून हाडपाची ही जापसालदारकी ह्या पन्ना प्रमुखांक दिल्या. त्या वाठारांतल्या पन्ना मुखेल्यांक ही जापसालदारकी येसस्वीपणान निभोवपाक कांय अडचणी येवपाच्यो आसात. सगळ्या पन्ना मुखेल्यांक ती पुराय करपाक जमपाची शक्यताय उणी आसा. कारण भाजपांत असंतुश्ट व्यक्ती आसात, तेच प्रमाण काँग्रेस पक्षांतय असंतुश्ट आसात. कोणेंच तांचे कडेन संपर्क सादिल्लो ना वा तांकां विस्वासांतूय घेतिल्ले नात. मोदींचें सध्या देशभरांत व्हडलें ल्हार आसा, ताका लागून मूळ भाजपाचे वावुरपी आशिल्ले हे असंतुश्ट भाजपाच्याच उमेदवाराक मत दितले अशें सगल्याच भाजपा फुडाऱ्यांक दिसता. दुसरे वटेन काँग्रेसीच्या वरिश्ठांक दिसता की असंतुश्ट काँग्रेसीचे पदाधिकारी आनी वावुरपी काँग्रेस पक्ष सोडून दुसरे सुवातेर कशे वतले? काँग्रेसी बगर तांकां पर्याय आसा खंय? 

फाटले विधानसभा वेंचणुकेंत काँग्रेसीचे जनार्दन भंडारी काँग्रेसीचे तिकेटाचेर लढो दिताले तेन्ना मुळांत काँग्रेसीचे आशिल्ले महादेव देसाय हांणी तृणमूल काँग्रेसीच्या तिकेटीचेर वेंचणूक लढयिल्ली. भाजपांत जें घडलें तेंच काँग्रेस पक्षांत जालें. आनी काँग्रेसीक ताचो नेटाचो धपको बसलो. भाजपाच्या आदल्या आमदारान अपक्ष म्हणून वेंचणूक लढयिल्ल्यान भाजपाकय ताचो धपको बशिल्लो. भाजपाच्या वरिश्ठांनी असंतुश्ट भाजप कार्यकर्त्या कडेन संपर्क करूंक ना आनी काँग्रेस पक्षान असंतुश्ट काँग्रेस फुडाऱ्या कडेन संपर्क करूंक ना, हाचो फटको दोनूय पक्षांक बसतलो. 

फाटले विधानसभा वेंचणुकेंत आदले आमदार विजय पै खोत, जे अपक्ष उमेदवार आशिल्ले, तांकां 4791 मतां मेळ्ळीं आनी इजिदोर फर्नाडीस हांकां 6012 मतां मेळ्ळीं. तर जे मुळ भाजपाचे आशिल्ले आनी उपरांत आम आदमी पक्षाच्या तिकेटाचेर वेंचणूक लढयली त्या अनुप कुडतरकार हांकां 835 मतां मेळ्ळीं. काँग्रेसीच्या जनार्दन भंडारीक 5351 मतां मेळ्ळीं. जाल्यार महादेव देसाय हांकां 1066 मतां मेळ्ळीं. आरजीच्या प्रशांत पागीक 1599 मतां मेळ्ळीं. हाचोय विचार करपाची गरज आसा.

दक्षीण गोंयांत आतां मेरेन तिरंगी लढत जाता तरी आतां काणकोणांत खरी लढत भाजपाची पल्लवी धेंपो आनी काँग्रेसीचे विरियातो फर्नाडीस हांचे मदीं जावपाची आसा. भाजपाचे आदले आमदार विजय पै खोत आनी आदले मंत्री इजिदोर फर्नाडीस हांणी अजून आपले पत्ते उक्ते करूंक नात.

नगरपालिका वाठारांतल्या 12 नगरसेवकांतले 4 नगरसेवक सत्ताधारी मंडळा पासून पयस आसात आनी सुप्रिया शेखर देसाय हांणी फाटले नगरपालिका वेंचणुकेंत 352 मतां मेळोवन जयश्री किशोर शेट (327) हांकां हारयिल्ली. जाल्यार पांडुरंग उर्फ ​​धीरज नायक गावकार हांणी किशोर शेट हांचे आड वेंचणूक लढोवन 488 मतां घेतिल्लीं. किशोर शेट हांकां 132 मतां पडिल्लीं. शुभम कोमरपंतान 521 मतां घेतिल्लीं, जाल्यार मारुती उर्फ ​​गुरू कोमरपंताक 279 मतां मेळिल्लीं. नीतू समीर देसाय हांकां 509 तर सनीजा देसाय हांकां 454 मतां मेळिल्लीं. ह्या चारय विरोधी नगरसेवकांची तांच्या वाड्यार खर पकड आसा आनी तांकां मेळिल्ल्या मतांची संख्या 1870 आसा. 10,293 मतां आशिल्ल्या पालिका वाठारांत ह्या चार नगरसेवकांक कुशीक दवरून उपकारचें ना, हें तितलेंच खरें.

आदल्या विधानसभा वेंचणुकेंत काँग्रेसीचे तिकेटीचेर लढपी जनार्दन भंडारी हांची उमेदवार विरियातो फर्नाडीस आनी विरोधी पक्ष फुडारी युरी आलेमांव आनी हेरांनी मनधरणी करपाचो यत्न केलो, पूण तो अजून यशस्वी जावंक ना अशें दिसता.

फाटले विधानसभा वेंचणुकेंत अपक्ष उमेदवार इजिदोर फर्नाडीसाक तेंको दिवपी भाजपा मंडळाचे आदले अध्यक्ष नदीप भगत आनी ताच्या हेर वांगडी हांचे कडेन भाजपान थळाव्या फुडारपणाक वायट दिसतलें ह्या हेतान आडनदर केल्या. हाका लागून भाजपाक मेळपी मतांचेर कांय प्रमाणांत परिणाम जांव येता. दुसरे वटेन भाजपाचे कडवे वावुरपी आनी एसटी फुडारी, खोतीगांवचे सरपंच दया उर्फ ​​उमेश गावकार हांचे कडेनूय थळाव्या फुडारपणान आडनदर केल्या. भाजपाकय ताचो धपको बसपाची शक्यताय न्हयकारूंक जायना. गांवडोंगरी पंचायतूय थळाव्या आमदारा आड आशिल्ल्यान हांगाय भाजपाक मार बसूं येता. पूण मडगांवचे आमदार दिगंबर कामत पल्लवी धेंपोक जिखून हाडपाक, काणकोणच्या दुखावल्ल्या भाजपा कार्यकर्त्यांची मनधरणी करपाचो यत्न करतना दिसतात, हें विशेश. 

– संजय कोमरपंत

94226 38576