भांगरभूंय | प्रतिनिधी
खबरां संस्था
विशाखापट्टनमः दसरे वन-डेंत ऑस्ट्रेलियेन भारताचेर 10 विकेटींनी सणसणीत जैत मेळोवन तीन मॅचींचे हे माळेंत 1-1 अशी बोरोबोरी करीत पयले मॅचींतले हारीची भारताक जशाक तशी जाप दिली. ऑस्ट्रेलियेचें हें जैत सामकें एकतर्फी आशिल्लें. भारताक तांच्या डावांत 26 ओव्हरींत 117 धांवड्यांत गुठलायले उपरांत जैता खातीर जाय आशिल्ल्यो धांवड्यो (121) 11 ओव्हरींत एकूय गडी वोगडायनास्तना केल्यो
मिचेल स्टार्काच्या फास्ट बॉलिंगे सामकार भारताच्या बॅट्समनांनी सामकी दीमी घातली आनी ताकां कशीबशी 117 धांवड्यां मेरेन मजल मारपाक जमलें. ऑस्ट्रेलियेचे ओपनर मिचेल मार्श आनी ट्रेवीस हेडान भारताच्या बॉलरांक सामकें धुवलें. ट्रेविसान 30 बॉलांत 51 आनी मिचेल मार्शान 36 बॉलांत नाबाद 66 धांवड्यांची खेळी करून पंगडाक 11 वे ओव्हरींत जैत मेळोवन दिलें.
पयले वन-डेंत भारतीय बॉलरांनी ऑस्ट्रेलियेच्या बॅट्समनांक नाका करून सोडल्ल्यान तांकां फकत 188 धांवड्यो करपाक मेळ्ळ्यो. आयताराचे मॅचींत मोहम्मद शमी, मोहम्मद सिराज हांची बॉलींग ऑस्ट्रेलियन ओपनरांचें कांयच वांगडे करपाक शकली ना. अक्षर पटेल, हार्दिक पंड्या आनी कुलदीप यादवाक लेगीत मिचेल मार्श आनी ट्रेवीस हेडान धुवून काडलें. भारताक 10 विकेटींनी हारोवपाची ऑस्ट्रेलियेची ही दुसरी खेप.
मिचेल स्टार्कान पयले वन-डेंत बरी बॉलींग केल्ली. आयतारचे मॅचींतून ताणे भारताच्या चार बॅट्समनांक आवट केले. भारताचो डाव सुरू करपाक आयिल्ल्या शुभमन गिलाक एकूय धांवडी करपाक मेळ्ळी ना. कॅप्टन रोहीत शर्मन 15 बॉलांत 13 धांवड्यो केल्यो. तो आनी शुबभनान स्टार्कान आवट केले. विराट कोहलीन भारताचो डाव साल्वार करपाचो बरोच यत्न केलो, मात तो लेगीत 35 बॉलांत 31 धांवड्यो करून परत आयलो. सूर्यकुमार यादव शू्न्याचेर बाद जालो. फाटले मॅचींत धडाकेबाज बॅटिंग करपी के एल राहुल हे मॅचींत फकत 9 धांवड्यो करपाक शकलो. हार्दिक पंड्याक सदचो सूर मेळो ना आनी एक धांवडी करून तो परत आयलो तेन्नाच आयचो दीस भारताचो न्हय हें स्पश्ट जालें. रवींद जडेजान कश्योबश्यो 16 धांवड्यो केल्यो पूण तो भारताचो डाव वाटावपाक शकल्यो नात.
शूभमल, सूर्यकुमार, शमी आनी सिराज शून्याचेर आवट जाले. जाल्यार राहुल (9), हार्दिक (1), कुलदीप यादव (4) दोन आंकडी धांवड्यो करपाक शकले नात. एक्स्ट्राच्या नांवार 14 धांवड्यो लागल्यो म्हणून भारताच्या डावांत 117 धांवड्यो जावपाक शकल्यो.
ऑस्ट्रेलियेचे ओपनर मिचेल मार्शान 36 बॉलांत 6 चौके आनी 6 सके आनी ट्रेविसान 10 चौक्यांनी 51 धांवड्यो करून भारतीय बॉलरांची सामकी पिसां काडली. आतां हे माळेचो निर्णय तिसरे वन-डेक लागतोलो.
स्टार्कान मोडलो ब्रेट लीचो विक्रम
मिचेल स्टार्कान वन-डे मॅचींत 9वे खेप पांच विकेटी घेवपाची कामगिरी करून तांचोच फास्ट बॉलर ब्रेट लीचो विक्रम मोडलो. ऑस्ट्रेलिये खातीर वन-डेंत सगल्यांत फास्ट पांच विकेटी घेवपी तो बॉलर थारलो. ताणे 8 ओव्हरीत एक ओव्हरींत एकूय धांवडी दिनास्तना 53 धांवड्यांत 5 विकेटी घेतल्यो. ब्रेट लीन 217 वन-डेत 9 फावट पांच विकेटी घेतिल्ल्यो. स्टार्कान 109 डावांत ही कामगिरी करून दाखयली. हे वळेरेंत ग्लेन मॅकग्रा तिसरे सुवातेर आसा. ताणे 247 डावांत सात फावट पांच विकेटी घेतिल्ल्यो.
सूर्यकुमाराचो लजेंत घालपी विक्रम
सूर्यकुमार टी-20 मॅचीत हीट बॅट्समन आसा तरी वन-डेंत तो निर्शेणी करता. टी-20 मॅची तो गाजयता मात वन-डेंत फाटल्या 12 डावांत तो फेल जायत आसा. ऑस्ट्रेलिये आडचे तीन वन-डे मॅचींत तो दोन फावट पयल्या बॉलाचेर आवट जाला. राहुल द्रवीड, सौरव गांगुली, हरभजन सिंग आनी युवराज सिंग हाचे वळेरेंत तो आतां पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
