भांगरभूंय | प्रतिनिधी
चार दीस उत्सवः 4 एप्रीलाक होमखण, आयज घोडे मोडणी
भांगरभूंय । प्रतिनिधी
दिवचलः विर्डी सांखळेच्या श्री सांतेरी शांतादुर्गा देवीच्या कळस उत्सवाक सोमारा 1 एप्रीलाक सुरवात जातली. चार दीस चलपी ह्या उत्सवा उपरांत 4 एप्रीलाक विर्डी गांवांतल्या महादेव देवळा मुखार वर्सपद्दती प्रमाण व्हड होमखण उत्सव मनयतले. विर्डी गांवच्या 13 दिसांच्या शिगम्याची होमखण उत्सवा उपरांत सांगता जातली.
13 दिसांच्या शिगम्याच्या 9 व्या दिसा सकाळीं म्हणल्यार 1 एप्रीलाक गांवांत घोडेमोडणी, तोप आनी उपरांत धुळवड मनयले उपरांत सांजे 4 वरांच्या सुमाराक श्री महादेव देवळांतल्यान श्री सांतेरी शांतादुर्गा देवीचो कळस गाराणें घालून, वाजयत गाजयत भाविकांचे हाजिरेंत भायर काडटले. सगळ्यांत पयलीं मानाच्या देवतांक भेटी दिवन सांजे वेळार गांवकारवाड्यार मानाच्या घरांक भेट दितलो. राती वेळार कळस गांवकारवाड्या वयले पुरयत सुदेव परांजपे हांच्या घरा राबितो करतलो.
दुसऱ्या दिसा 2 एप्रीलाक सकाळीं जल्मीवाड्या वयल्या घरांनी भोंवतलो. सांजे 4 वरांच्या सुमाराक परबवाड्या वयल्या घरांनी भोंवून सावळवाड्यार गांवची खुटी वाठारांत भेट दिवन तीर्थ दितलो. ते उपरांत राती वेळार आनंद अवखळे हांच्या घरा कळसाचो राबितो आसतलो.
3 एप्रीलाक तिसऱ्या दिसा आनंद अवखळे हांच्या घरा दनपारां म्हाप्रसाद जाले उपरांत सांजे वेळार कळश भायर काडटले आनी कारेखाजन वाठारांतल्या घरांनी भोंवतलो. तशेंच देव क्षेत्रपाल, भुमिका देवीक भेट दितलो. रातच्या 10 वरांचेर कौलां जातलीं. ते उपरांत शितलाई देवीक भेट दिवन तीर्थ दितलो. राती वेळार पुरयत सुदेव परांजपे हांच्या घरा राबितो करतलो.
चवथ्या दिसा 4 एप्रीलाक सकाळीं कळस धाटवाड्या वयल्या घरांक भेटी दितलो. सांजे वेळार च्यारीवाड्या वयल्या घरांक भेटी दिले उपरांत थंय कौला जातलीं. ते उपरांत घाडीवाड्या वयल्या घरांनी भोंवतलो. थंय लेगीत कौलां जातलीं. ते आदीं घाडीवाड्यार वतना वाटेर व्याघ्रेश्वर देवाक देवी कौल दितली. घाडीवाड्यार कौल दिले उपरांत राती वेळार कळस भाटांतल्यान हे परंपरीक वाटेन महादेव देवळा कडेन येतलो. थंय दाळून दवरिल्ल्या होमखणाक भोंवताडो मारून देवीचो कळस देवूळवाड्या वयल्या घरांक भेटी दितलो. ते उपरांत वाजयत गाजयत व्रत घेतिल्ल्या धोंडाच्या सांगातान कऴसाक होमखणाचे सुवातेर हाडटले. होमखणाक प्रदक्षिणा घालून देवी होमखणाक उजो लायतली आनी सगळे धोंड कळसा सयत सांतेरी शांतादुर्गा देवळा कडले तळयेर न्हांवपाक वतले. फांतोडेर सगळ्यांत आदीं धोंड आनी उपरांत देवीचो कळश माथ्यार घेतिल्लो मोडपुरूस होमखणांतल्यान वतले. महादेव देवळाच्या मंडपांत भौशीक कौलां जालें उपरांत देवीचो कळस परतून देवळांत प्रवेश करतलो आनी उत्सवाची सांगता जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
