भांगरभूंय | प्रतिनिधी
पणजी, प्रतिनिधी: विरोधी पक्ष फुडारी युरी आलेमाव हांणी २ फेब्रुवारी सावन सुरू जावपी आठव्या गोंय विधानसभेच्या सव्या अधिवेशना खातीर पांच खाजगी वांगडी थाराव मांडल्यात. जर थाराव सभापती रमेश तवडकार हांणी दाखल करुन घेतल्यार ते शुक्रारा ९ फेब्रुवारीक चर्चेंत येतले. चिटयांचे पद्दतीने वेंचिल्ल्या खाजगी थारावांची वळेरी २५ जानेवारी दिसा जारी करतले.
पक्षांतरा आड कायद्यांतले दुरुस्तीचेर तांच्या पयल्या खाजगी वांगडी थारावांत विरोधी पक्ष फुडारी युरी आलेमाव हांणी विलीनीकरण ही संकल्पनाच काडिल्ल्याची आनी विधानसभे विशीं उच्च न्यायालयाच्या मुखेल न्यायमूर्तींनी नियुक्त केल्ल्या न्यायाधीशाकडेन संसदे विशीं सर्वोच्च न्यायालयाच्या न्यायाधिशानी नियुक्त केल्ल्या न्यायमुर्ती कडेन पक्षांतरा संबंदी प्रकरणांची निर्णय प्रक्रिया सोपोवपाची गरज उक्तायली.
देशाच्या वेंचणूक आयोगान गोंयच्या अनुसूचीत जमातीं खातीर विधानसभा मतदारसंघ अधिसुचीत करचे खातीर कायद्यांतले सगळे उपलब्ध तरतुदींचो सोद घेवन सरकारान ते संबंदी कारवाय करची, अशें युरी आलेमाव हांणी तांच्या दुसर्या खाजगी वांगडी थारावांत म्हणलां.
विरोधी पक्ष फुडारी युरी आलेमाव हांणी गोंय विधानसभे मुखार सगळ्या भारतीयांक दोट्टी नागरिकत्व दिवपाची प्रक्रिया बेगीन करपाची आनी हे मजगतीं ज्या गोंयकारांनी आपली पुर्तुगालांत जल्माची नोंदणी केल्या. मात जांचे कडेन पुर्तुगेज पासपोर्ट ना अशा सगळ्यांक ओसीआय दर्जो दिवपाची मागणी परराष्ट्र मंत्रालय आनी केंद्र सरकाराक करची अशी शिफारस तिसर्या खाजगी वांगडी थारावांत केल्या.
दर वर्सा १६ जानेवारीक अस्मिताय दीस (ओपिनियन पोल डे) सरकारी पांवड्यार मनोवचो. ते खातीर चोवथो खाजगी वांगडी थाराव विरोधी पक्ष फुडार्यांनी दाखल केलो. फकत ओपिनियन पोलाक लागूनच आयज आमी स्वताक गोंयचे वेंचून आयिल्ले प्रतिनिधी म्हणपाक शकतात अशें नमूद करून युरी आलेमांव हांणी ह्या इतिहासीक दिसाची याद करप ही म्हत्वाची गजाल आशिल्ल्याचें थारावांत म्हणलां.
विधानसभेच्या मार्च अधिवेशनांत विधवा भेदभाव, विधवा अत्याचार आनी विधवांक कुशीक दवरप हाचेर तांच्या हाचे पयलींच्या खाजगी वांगडी थारावाचेर चर्चा जाली. तरी बायलां आनी बालविकास मंत्री विश्वजित राणे हांणी युरी आलेमाव हांकां आस्वासन दिवन लेगीत सरकारान अपेक्षीत कायदो हाडपा खातीर कसलींच पावलां उबारूंक ना. ताका लागून परत विरोधी पक्ष फुडारी युरी आलेमाव हांणी अन्याय करपी प्रथा सोंपोवपाचो थाराव मांडलो.
ह्या थारावांत नायक-डिचोलकार कुटुंबांतले आपली धूव डॉ. गौतमी आनी डॉ. प्रथमेश हांचें लग्न करपी उषा नायक हिचो विशेश उल्लेख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
