भांगरभूंय | प्रतिनिधी
संदीप सांवत हांची सांतक्रुझच्या उप सरपंच पदार निवड
पणजी, प्रतिनिधी: सांताक्रुझ उपसरपंचाचे वेचणुकेंत राजकारण पळोवपाक मेळ्ळें. सांताक्रुझची सरपंच जेनिफर दे ओलिव्हेर हांचे आड अविश्वास थारावाचेर सय मारपी संदीप सावंत हो उपसरपंच म्हूण वेंचून आयला. मात, वेंचून येतकच तांणे एके पंच वांगड्या सयत जेनिफर हांच्या पॅनलाक तेंको दिवन त्या पॅनलाक भोवमतांत हाडलां. शुक्रारा सरपंच पदाची वेंचणूक जातली.
६ मेंक सांताक्रुजाची सरपंच जेनिफर दे ओलिव्हेर आनी उपसरपंच एल्सन ब्रागांझा हांचे आड स पंच वांगड्यांनी अविस्वास थाराव दाखल केल्लो. गांवां खातीर म्हत्वाचे निर्णय घेतना आमकां सरपंचान विस्वासांत घेवंक ना असो आरोप ह्या थारावांत करून तो संमत केल्लो. देखून बिरेस्तारा उपसरपंच पदाची वेंचणूक आसली.
सांताक्रुझची आदली सरपंच जेनिफर दे ओलिव्हेर हिचे खातीर ही सेमी फायनल. निमाण्या खिणाक तिणें खेळ घुंवडावन विरोधी पॅनलाचो फुडारी डाॅमनीक परेरा हांची गेम केली. सुरवातेक ६ विरोधी पंच वांगड्यांनी परेरा हांचें नांव उपसरपंच पदा खातीर निश्चीत केलें आनी जेनिफर हांच्या पॅनलान एल्सन ब्रागांझा हांचें नांव सुचयल्लें. मात, सरपंच पदा खातीर तीन अर्ज आयले. डाॅमनीक, एल्सन आनी संदीप सावंत हांचे. संदीप हांकां ७ पंच वांगड्यांचीं मतां मेळून ते जैतिवंत जाले, डाॅमनीक हांकां ४ मतां पडलीं जाल्यार एल्सन हांकां शुन्य.
वेंचणूक जाले उपरांत उपसरपंच सावंत हांचे सयत २ विरोधी पंच वांगड्यांनी जेनिफर हिच्या पॅनलाक तेंको दिवन परत तांचें पॅनल सत्तेर हाडलें. पयशांच्या हांयसाक लागून ह्या दोगय पंच वांगड्यांनी उडयो मारल्यात असो आरोप विरोधी पंच वांगडी डाॅमनीक परेरा हांणी केला.
शुक्रारा सरपंच पदाची वेंचणूक जातली आनी जेनिफर हिचे खातीर ती निमाणी थारतली.
वेंचणूक जाले उपरांत डाॅमनीक हांणी सांगलें, विरोधांत आमी आतां फकत चवग जाण आसात आनी सांताक्रुझच्या लोकांक आमचो अभिमान आसा. आमी खूश आसात आनी विरोधक म्हूण आमी काम चालूच दवरतले. आमकां चड कांय उलोवपाचें ना. सगळे सांताक्रुझाचे थळावे थारयतले. ह्याच दोन पंचांनी आमकां विस्वासांत घेवंक ना असो आरोप करून अविस्वास थारावचेर सय केल्ली. चार दिसा उपरांत हांणी आपलो निर्णय कित्या खातीर बदल्लो, असो प्रस्न तांणी केलो.
आमचे भितर कांय गैरसमज जाल्ले म्हूण हांवें थारावचेर सय मारिल्ली. फकत उदरगती खातीर हांवें परत जेनिफर हांच्या पॅनलाक तेंको दिला. परत जेनिफर पॅनलांत येवपा खातीर हांवें तीन अटी दवरल्यात आनी त्यो मान्य केले उपरांतूच हांवें तांकां तेंको दिला. जेनिफर हांकां परत तेंको दिवपा खातीर दुडू घेतल्यात ह्यो फकत वावड्यो आशिल्ल्याचें नवे उपसरपंच संदीप सावंत हांणी सांगलें.
हांव पंचायतीन उदरगत करपाक आयलां, चोरपांक येवंक ना. हांवें पयशे दिवन उमेदवारांक विकतो घेतला असो आरोप विरोधक करतात. तो तांचो प्रस्न. म्हाका ताचेर काय उलोवपाचें ना. अपेस सोंसपाक जायना म्हूण ते आरोप करता आसूं येता. मात २०१७ सावन आडकून उरिल्लीं उदरगतीचीं कामां म्हज्या कार्यकाळांत पुराय जाल्यांत आनी १५ व्या वित्त आयोगाची मुखावेलीं कामां बेगेनूच चालीक लागतलीं, अशें आदली सरपंच जेनिफर दे ओलिव्हेर हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
