विरोधकांचें भाजपाचेर ‘इमोशन’ अस्त्र !

भांगरभूंय | प्रतिनिधी

दिल्लींतलें रामलीला मैदान हें तशें जायत्या इतिहासीक आंदोलनाचें साक्षिदार आसा आनी तातूंतलीं कांय आंदोलनां राजकारणाची दिका बदलपी थारिल्लीं आसात. हें सत आसलें तरी आयतारच्या राजकी महानाट्या कडेन एक आंदोलन म्हणून कोणूय पळयता अशी कल्पना कोणूच करचो ना.

केंद्रांतल्या भारतीय जनता पक्षाच्या विरोधांत आतां मेरेन सोडिल्लीं सगलीं अस्त्रां निकामी आनी बोथट थारले उपरांत विरोधकांनी आतां तांच्य भात्यांत हालींच जमा जाल्लें ‘इमोशन’ अस्त्र तांचेर सोडपाचो निर्णय घेतला आनी ह्या अस्त्राची चांचणी तांणी आयतारा नवी दिल्लींतल्या इतिहासीक रामलीला मैदानार घेतली. आम आदमी पार्टीचे सर्वेसर्वा आनी दिल्लीचे मुख्यमंत्री अरविंद केजरीवाल हांणीच चड करून हें नवें शस्त्र वा अस्त्र स्वता बंदखणींत वचून हें तांकां उपलब्द करून दिलां अशें म्हणपाक जाता. कारण देशाचे राजधानींत सध्य गाजता त्या सोरो घोटाळो प्रकरणांत अानी धा फावटी चवकशे खातीर समन्स मेळून लेगीत अरविंद केजरीवाल लोकसभा वेंचणुको जाहीर जाय मेरेन थांबले आनी जें जावपाचें तेंच जालें. केजरीवाल हांकां अपेक्षीत आशिल्लें तेंच घडलें. सक्तवसुली संचालनालयान (ईडी) मुख्यमंत्री अरविंद केजरीवाल हांकां दया दाखोवपाचो प्रस्नूच नाशिल्लो. केजरीवाल हांणीय बंदखणींत वच्चें पयलीं फुडली राजकी नाट्याची संहिता बरोवन तयार दवरिल्ली. आपली घरकान्न सुनिता हीच ह्या नाट्याची हिरोयन आशिल्ली जाल्यार जोड हिरोयिनीची भुमिाक तांणी कल्पना सोरेन आनी अनिता सिंह हाचे खातीर निश्चीत केल्ली. हेर भुमिकां खातीर तांणी ‘इंडी’ आघाडेंतल्या हेर राजकी पक्षांच्या फुडाऱ्यांक पात्रां वेंचून काडपाची मेकळीक दवरिल्ली. आनी ते प्रमाण इतिहासीक रामलीला मैदानार आयतारा ह्या सुनियोजीत राजकी नाट्याची रंगीत तालीम जाली आनी ‘इमोशनल’ नाट्य सुनिता केजरीवाल, कल्पना सोरेन आनी अनिता सिंह ह्या तीन हिरोयिनींनी बरे तरेन रंगयलें. अजूनय सुनिताताईंक तातूंत रंग भरपाक जाताशिल्लो पूण तिका तें जमलें ना आनी भुमिका सादर करतना मात्शी कृत्रिमता दिसून आयली.
आतां कल्पना सोरेन कोण, हाची कल्पना वाचकांक आयलीच आसतली. सध्या अश्याच एका घोटाळ्यांत नाका मेरेन बुडिल्ले आनी ईडी कडल्यान अटक जाल्ले आनी गजा आड आशिल्ले झारखंडाचे आदले मुख्यमंत्री हेमंत सोरेन हांची कल्पना ही घरकान्न. मुख्यमंत्रीपदाचेर आसतना हेमंत सोरेन हांकां अटक जाल्ली, पूण केजरीवाल हांचे प्रमाण तांणी मुख्यमंत्रीपदाचो राजिनामो दिवपाक न्हयकार दिलो ना आनी पद सोडून तांणी पर्यायी वेवस्थाय केली. ईडी कडल्यान येवपी समन्स न्हयकारपाचो धडो केजरीवाल हांणी सोरेन हांचे कडल्यानूच घेतलो. पूण निमाणे दोगांकूय अटक टाळपाक जाली ना. कारण तांचो गुन्यांव मुदलांत इतलो गंभीर आसा की लोकसभा वेंचणुकेचे फाटभुंयेर आपल्याक अटक जावची ना, हें तांणी केल्लें भाकीत चुकीचें थारलें. अनिता सिंह सोरो घोटाळ्यांतलो आनीक एक आरोपी खासदार संजय सिंह हांची घरकान्न. हे महाशय अजून कोठयेंत आसात आनी ताकाय मनीश सिसोदिया हांचे प्रमाण न्यायालय जमीन दिना. जाल्यार सुनिता- कल्पना- अनिता ह्या तिगाय बायलांची ढाल करून विरोधी इंडी आघाडेन प्रधानमंत्री नरेंद्र मोदी आनी तांच्या भारतीय जनता पक्षा आड आपले दंड इतिहासीक रामलीला मैदानार फुगोवन दाखयले तेन्ना ह्या नाट्यांतलीं हेंर पात्रां आशिल्लीं तीं म्हणल्यार राहूल गांधी, मल्लिकार्जून खर्गे, ऊबाठाचे उद्धव ठाकरे, सोनिया गांधी, प्रियांका वाड्रा, अखिलेश यादव, तेजस्वी यादव. केजरीवाल हांच्या मंत्रीमंडळांतली आतिशी आनी हेरांच्या वांट्याक किरकोळ भुमिका आयल्यो. आनी तांणी त्यो बरे
भशेन केल्यो.
नवी दिल्लींतल्या इतिहासीक रामलीला मैदानार ह्या राजकी महानाट्याचे आयोजक, येजमान अर्थांतूच आम आदमी पक्षूच, मात त्या वयल्यानूय उपरांत वाद जाल्ल्याचें खबर आसलें तरी ताची दखल ना घेतिल्ली बरी. मुद्दो असो आसा की आम आदमी पार्टी आनी ‘इंडी’ आघाडेंतल्या हेर पक्षांनी मेळून सादर केल्ले हें ‘इमोशनल’ राजकी म्हानाट्य निमाणे मतदार रुपांतल्या लोकांक आवडटलें काय? सुनिता, कल्पना आनी अनिता हांच्या रुपान भाजपाचेर सोडिल्लें हें इमोशन अस्त्र चलतलें कांय कितें होच सद्या चर्चेचो विशय आसा. आनी जे परिस्थितींत ह्या अस्त्राचो वापर केला ताचो विचार केल्यार तें बोथट थारपाची शक्यताय चड दिसता. 13 वर्सां आदीं ह्याच मैदाना वयल्यान अण्णा हजारे हांच्या फुडारपणा खाला भ्रश्टाचारा आड सुरू केल्ल्या इतिहासीक आंदोलनांतल्यान अरविंद केजरीवाल हांचे नेतृत्व फुडें आयिल्लें हें सगल्यांक खबर आसतलेंच. तेन्ना ह्या सगल्यांच्या रडारार अर्थातूच तेन्ना भ्रश्ट काँग्रेस पक्षूच आशिल्लो. दिल्लीची तेन्नाची मुख्यमंत्री शीला दीक्षित आसूं वा सोनिया- राहूल सयत काँग्रेसीचे जायते फुडारी ह्या आंदोलनांतल्यान जल्माक आयिल्ल्या आम आदमी पक्षाच्या टार्गेटाचेर आशिल्ले. पूण दुर्दैव अशें की अरविंद केजरीवाल हांकां 13 वर्सां उपरांत ह्याच काँग्रेस फुडाऱ्यांच्या पांया कडेन दिमी मारची पडटा. एका परस एक अश्या सवाई भ्रश्ट फुडाऱ्यां कडेन हातमेळोवणी करत त्याच मैदानार तांचे सयत प्रधानमंत्री नरेंद्र मोदी आनी तांच्या भारतीय जनता पक्षा कडेन केजरीवाल हांकां लडचे पडटा हाचे वयल्यान आम आदमी पक्षाच्या विस्वासार्हतेचेर कोणेय प्रस्न उपस्थीत केल्यार तें चूक अशें कशें म्हणप ?
दिल्लींतलें रामलीला मैदान हें तशें जायत्या इतिहासीक आंदोलनाचें साक्षिदार आसा आनी तातूंतलीं कांय आंदोलनां राजकारणाची दिका बदलपी थारिल्लीं आसात. हें सत आसलें तरी आयतारच्या राजकी महानाट्या कडेन एक आंदोलन म्हणून कोणूय पळयता अशी कल्पना कोणूच करचो ना. भ्रश्टाचारांत पुराय बुडिल्ले सगलेच एकठांय आयिल्ल्याचें चित्र पळोवपाक मेळटा आनी लोकसभा वेंचणुकेचे फाटभुंयेर सत्ताधारी भाजपा कडल्यान लोकांच्या मनांत तेंच घालपाचे यत्न चल्ल्यात. विरोधक एकठांय आयिल्ल्याचें दाखोवपाचे यत्न चलिल्ले दिसतात. दिल्लींत आयतारा एके माचे वयल्यान एकीचो नारो दिवपी राजकीय पक्ष बऱ्याच सुवातेर एकमेकां आड झुजतना दिसतले ताका लागून ताचें एकठांय येवप जायते प्रस्न तयार करपी आसा. दिल्लींत दिशिल्लो एकचार फक्त दिखावू स्वरुपाचो आशिल्ल्याचो जायत्या जाणांक दिसता. राजधानी दिल्लींत जाल्यार ताचो मातूय परिणाम भाजपाच्या येसाचेर जावचो ना अशें त्या पक्षाचे फुडारी ठामपणान सांगतात. लोकसभा वेंचणुकेंत भाजपान फिक्सिंग करून आमच्या दोन फुडाऱ्यांक बंदखणीत उडयल्यांत असो दावो राहूल गांधी करपाक लागल्यात. किदेंय आसुंदी दिल्लींत सुनिता-कल्पना- अनिता हेच विरोधकांचें ‘इमोशन’ अस्त्र आशिल्ले हे विशीं दुमत आसपाचें कारण ना आनी हाचे फुडेंय ‘इंडी’ आघाडेच्या जायत्या प्रचार सभेंतल्यान ते भाजपाचेर सोडटले. आतां सहानुभुतीचें हें अस्त्र कितले मेरेन चलतलें आनी तें बोथट करपा खातीर भाजपा कसलो पवित्रो घेतली हें पळोवपा सारकें आसा. मोदी जाल्यार सांगतात की भ्रश्टाचाऱ्यांची आतां गय नाच्च. विरोधकां कडल्यान चड ठोस अशे मुद्दे फुडें येनात आनी लोकां सामकार प्रभावी असो पर्याय सध्या ना हें मात न्हयकारपाक
जायना.

वामन प्रभू
9823196359