भांगरभूंय | प्रतिनिधी
खबरां संस्था
अहमदाबादः चवथे टॅस्ट मॅचीच्या आपल्या पयल्या डावांत भारतान 571 धांवड्यो करून ऑस्ट्र्रेलियेच्या पयल्या डावांक जशाक तशी जाप दिवन 91 धांवड्यांची आघाडी घेतली. विराट कोहलीन 15 चौक्यांनी 364 बॉलांत 186 धांवड्यो केल्यो. दोट्टी शेंकडो करपाक ताका 14 धांवड्यो कमी पडल्यो तरी ताचे खेळीक लागून ही टॅस्ट मॅच ड्रॉ उरतली हें स्पश्ट जालें.
शुभमन गील आनी विराटान शेंकडे केले आनी अक्षर पटेलान 79 धांवड्यो करून भारताची बाजू भक्कम केली. ऑस्ट्रेलिये वतीन नॅथन लायनान आनी टॉड मर्फीन दरेकी तीन विकेटी घेतल्यो. श्रेयस अय्यर दुखापतीक लागून बॅटिंग करपाक शकलो ना. ताका लागून भारताचो डाव णव विकेटीचेर सोपलो.
गावस्कार करंड चवथे टॅस्ट मॅचीचो चवथो दीस पुरायपणान भारताचो स्टार बॅट्समन विराट कोहलीच्या नांवार जालो. अहमदाबादच्या नरेंद्र मोदी स्टेडियमाचेर विराटान 1205 दीस 23 मॅची आनी 41 डावां उपरांत टॅस्ट मॅचींत आनीक एक शेंकडो केलो. ताच्या दोट्टी शेंकड्याक 14 धांवड्यो कमी पडल्यो.
विराटाच्या 186 धांवड्याचे मेरेथॉन खेळाच्या नेटार भारतान आपल्या पयल्या डावांत 9 बाद 571 धांवड्यो केल्यो. श्रेयस अय्यर दुखापतीक लागून बॅटिंग करपाक शकलो ना. चवथ्या दिसाचो खेळ सोप मेरेन ऑस्ट्रेलियेन आपल्या दुसऱ्या डावांत 3 धांवड्यो केल्यात, ओपनर ट्रेविस हेड (3) आनी नायट वॉचमन मॅथ्यू कुहनेमन (0) खेळटात. भारताची आघाडी भरून काडपाक तांकां 88 धांवड्यो जाय.
विराटान 23 नोव्हेंबर 2019 दिसा बांगलादेशा आड आपलो 27 वो टॅस्ट शेंकडो केल्लो. आयतारा ताणे केल्लो 28वो टॅस्ट शेंकडो आशिल्लो. आतां तांच्या नांवार 75 आंतरराष्ट्रीय शेंकडे जाल्यात. ताच्या नांवार आतां 28 टॅस्ट शेंकडे, 46 वन-डे आनी टी-20त एक शेंकडो आसा. उमेश यादव एक बॉल खेळनास्तना रन आवट जालो. विराट कोहलीच्या कॉलाचेर तो दोन धांवड्यो करपाक धांवलो मात आवट फिल्डा वयल्यान डयरेक्ट थ्रोचेर तो रन आवट जालो. रविंचंद्रन आश्वीन 7 धांवड्यो करून नाथन लायनाचे बॉलार आवट जालो.
अक्षर पटेलाचे 4 सके
अक्षर पटेनाल 79 धांवड्यो करून मिचेल स्टार्काच्या बॉलार आवट जालो. ताणे 4 शके आनी 5 चौके मारून विराटाच्या वांगडा 6वे विकेटी खातीर 162 धांवड्यांची भागिदारी केली. श्रीकर भरताच्या रुपान भारताची पांचवी विकेट पडली. ताणे 44 धांवड्यो केल्यो. ताकां नाथन लायनान पीटर हेंड्सकॉम्ब वरवीं कॅच आवट केलें. भरतना कोहली वांगडा 84 धांवड्यांची भागिदारी केली. ताचे पयलीं रवींद्र जडेजा 23 धांवड्यो करून आवट जालो. जडेजान कोहली वांगडा 170 बॉलांत 64 धांवड्यांची भागिदारी केली.
भारतान आयतारा 3 बाद 289 धांवड्या वयल्यान आपलो पयलो डाव फुडें सुरू केलो. ताचे पयलीं ऑस्ट्रेलियेन आपल्या पयल्या डावंत 480 धांवड्यो केल्लो. भारताच्या पयल्या डावांत शुभमन गिलान आपलो 5वो आंतरराष्ट्रीय शेंकडो केलो. कॅप्टन रोहीत शर्मान आपले 17 हजार धांवड्यो पुराय केल्यो. ही कामगिरी करपी तो 6वो भारतीय बॅट्समन थारलो. गिलना रोहीत शर्मा वांगडा 74, चेतेश्वर पुजारा वांगडा 113 आनी कोहली वांगडा 58 धांवड्यांची भागिदारी केली.
बऱ्याद दिसां सावन विराट कोहलीक टॅस्ट मॅचींत शेंकडो करपा जमनाशिल्लें. ऑस्ट्रेलिये आड शेंकडो करून ताणे आपूण अजून किंग कोहली आसा हें दाखोवन दिलें. 7व्या नंबराचेर खेळपाक आयिल्ल्या अक्षर पटेलान 113 बॉलांत पांच चौके आनी चार सक्यांनी 79 धांवड्यो केल्यो. नागपुरांत जाल्ले पयले टॅस्टींत ताणे 84 आन दिल्लींतल्या दुसरे टॅस्टींत 74 धांवड्यो केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
