भांगरभूंय | प्रतिनिधी
संवसारांतलो सगल्यांत लोकप्रीय अभिनेतो, विनोदाचो बादशाह चार्ली चॅप्लीन हांची हालींच जयंती जाली. पयल्या म्हाझुजा पयलींच्या काळांत मुकपटांत अभिनय करून आपले आगळे वेगळे शैलीन प्रेक्षकांक हांसोवपी चार्ली चॅप्लीन हांचो जल्म 16 एप्रील 1989 दिसा लंडनांत जालो. चार्ली चॅप्लीन हांणी आपल्या अभिनयाची सुरवात शाळेंत आसतना केली. पिरायेच्या णवव्या वर्सा शाळेंतल्या नाच पंगडांत तांची निवड जाली. त्या पंगडा वरवीं सादर जावपी कार्यावळींनी ते अभिनय आनी नाच करताले. तांची आवय मानसीक दुयेंसान त्रस्त आशिल्ल्यान पिरायेच्या तेराव्या वर्साच तांकां शाळा सोडची पडली. घर चलोवपा खातीर तांकां ल्हान व्हड कामां करचीं पडलीं. घरची परिस्थिती सुमाराचीच आसून लेगीत तांणी आपलो आत्मविस्वास उणो जावंक दिलो ना. परिस्थितीन उरफाटें तांकां खंभीर केलो.
त्या वेळा वेले परिस्थिती विशीं चार्ली चॅप्लीन आपल्या आत्मचरित्रांत म्हणटात, म्हाका ते परिस्थितीचो त्रास चड वेळ सोंसचो पडलो ना. कारण आमी ते परिस्थितींतल्यान सेगीत वाटचाल करीत आशिल्ले, आनी ल्हान आशिल्ल्यान हो त्रस हांव सहजतायेन विसरून वतालों. तांचो आत्मविस्वास कणखर आशिल्लो. ल्हान व्हड कामां करून लेगीत ते केन्नाच आपले मोखी पसून कुशीक सरले नात. एक मोटो अभिनेतो जावपाची मोख पुराय करपा खातीर ते नाटक कंपनींनी नेमान संपर्क सादताले, आनी तांच्या कश्टाक फळ मेळ्ळें. तांकां खूबशा नाटकांनी भुमिका मेळूंक लागल्यो.
मुखार व्हडल्या पड्ड्यार लेगीत तांकां संद मेळत गेली. पड्ड्या वेले तांचें आगळें वेगळें रूप प्रेक्षकांक खूब मानवूंक लागलें. पड्ड्या वेली तांची एन्ट्री जाली की प्रेक्षक पोटभर हांसताले. एक तायट कोट, ल्हानशी हॅट, मोटे शूज आनी चेऱ्याचेर ल्हानशी मिशी अशें तांचे पड्ड्या वेलें आगळें वेगळें रूप प्रेक्षकांक खूब भावलें. हें रूप प्रेक्षकांक इतलें आवडलें की मुखार तांचें हेंच रूप तांची वळख जाली. ह्या व्यक्तिरेखे विशीं ते आपल्या आत्मचरित्रांत म्हणटात, ज्या खिणाक हांवें तो भेस केलो, मेकअप केलो, त्याच खिणाक हांव ती व्यक्तिलरेखा अणभवूंक लागलों. हांव ताका वळखतालों आनी रंगमाचयेर आस मेरेन तो म्हजे भितर भिनिल्लो आसतालो.
चार्ली चॅप्लीन हांणी आपले जिणेंचें सगलें सार पड्ड्यार खूबशे तरेन संवसारा मुखार मांडलें. मस्करी करपा खातीर दुख्ख हें कारण आसता. मस्करी करप म्हणल्यार प्रतिकार करप सैमाच्या शक्ती मुखार स्वताच्या हतबलतेतूय आपणे हांसत रावूंक जाय. प्रतिकुलतायेक हांसत हांसत सामकार वचूंक जाय. नाजाल्यार मानसीक रितीन खचून वतले अशें ते म्हणटाले. म्हणूनच तांच्या आयुश्याचे लागींचो सिनेमा ‘द कीड’ हाचें ओपनींग टायटल आशिल्लें. ‘अ पिक्चर वीथ अ स्मायल अॅण्ड परहॅप्स अ टियर.’ स्वताचें दुख्ख विसरून आवयचें सपन साकार करपा खातीर तांणी पड्ड्यार पिशेपणाची भुमिका करून संवसारांतल्या प्रेक्षकांच्या मनार राज्य केलें. भाशेच्या बंधना बगर पड्ड्या वेल्यान तो खंयच्याय प्रेक्षकां कडेन संवाद सादूंक शकलो. ते खातीर तांणी वापरिल्लें साधन म्हणल्यार ‘भरपूर हांसू आनी ल्हानशें आसूं.’ चार्ली चॅप्लीन हांच्या अभिनयाचें वैशिश्ट्य म्हणल्यार ते प्रेक्षकांक इतले हांसयताले की प्रेक्षक आपली सगली कूड हालोवन हांसताले, आनी दुसऱ्याच खिणाक रोखडेच ते दोळ्यांत उदक हाडून रडयताले. आत्मविस्वासाच्या बळग्यार तांणी खूबश्यो कल्पना, युक्ती साकारून त्यो पड्ड्यार साकारल्यो आनी गाजयल्यो.
संवसारीक पटलार महानायक म्हूण ते जिणभर वावुरले. पयल्या म्हाझुजाच्या काळांतूय तांणी लोकांक हांसोवपाचें कार्य केलें. 25 वर्सां उपरांत संवसारीक मंदी आनी हिटलराच्या काळांतूय तांणी प्रेक्षकांक हांसोवपाचें कार्य थांबयलें ना. लोकांक ज्या काळांत मनरिजवणेची आनी हास्याची चड गरज आशिल्ली त्या काळांतूय चार्ली चॅप्लीन हांणी लोकां खातीर बऱ्यो भुमिका केल्यो. 25 डिसेंबर 1977 दिसा प्रेक्षकांक खळखळून हांसोवपी हो व्हड अभिनेतो प्रेक्षकांक दुख्खाच्या दर्यांत सोडून काळाच्या पड्ड्या आड गेलो. चार्ली चॅप्लीन हे एक बरे अभिनेते आनी बरो मनीस म्हूण तांणी आपली संवसारभर नामना मेळयली. लोक तांची सदांच याद करतात आनी करीत रावतले हें मात सामकें खरें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
