भांगरभूंय | प्रतिनिधी
आशियायी खेळांत आनी राष्ट्रकूल खेळांत भांगरा पदक जिखपी विनेश फोगाटान तिणें आपलो अर्जुन पुरस्कार आनी खेल रत्न पुरस्कार कर्तव्य पथाचेर दवरलो.
भारताची कुस्ती खेळगडी विनेश फोगाट हिणें अर्जुन आनी खेल रत्न पुरस्कार परत केले. ती प्रधानमंत्री नरेंद्र मोदी हांची भेट घेवन पुरस्कार परत करपाची आशिल्ली. पूण, पुलिसांनी फोगाट हिका प्रधानमंत्री कचेरे मेरेन वचपाक दिवंक ना. ताका लागून तिणें कर्तव्य पथाचेर पुरस्कार दवरून परत गेली.
आपूण आपले पुरस्कार परत करतली अशें तिणें मंगळारा जाहीर केल्लें. तिणें प्रधानमंत्री नरेंद्र मोदी हांकां पत्र लेगीत बरयिल्लें. कुस्ती खेळगडे न्याय मेळोवपा खातीर संघर्श करीत आसतना पुरस्कार दवरप योग्य थारचें ना. आमची जीण सरकाराचे जायराती भशेन ना. सरकार महिला सशक्तीकरणा विशीं उलयता पूण, प्रत्यक्षात कांयच काम करिना अशें तिणें पत्रांत म्हणिल्लें.
बायलां कुस्ती खेळगडयांनी भाजपा खासदार ब्रिजभुशण सिंगाचेर लिंगीक अत्याचार केल्ल्याचो आरोप केला. कुस्ती म्हासंघांत ब्रिजभुषण सिंगाच्या गटाचें जैत जाल्ल्यान साक्षी मलिकान खेळांतल्यान संन्यास घेवपाची घोशणा केल्ली. तशेंच बजरंग पुनियान आपलो पुरस्कार परत केल्लो. ते उपरांत सरकारान नव्या कुस्ती म्हासंघाची कार्यकारिणी रद्द करपाचो निर्णय घेतिल्लो.पूण, ब्रिजभुशण सिंगाचेर कारवाय जाय मेरेन कुस्ती खेळगड्यांनी आक्रमक रावपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
