विधानसभा वेंचणूक : उत्तर गोंयां खातीर ईव्हीएम मशिनाची ३ ते १४ ऑगस्ट मेरेन तपासणी
भांगरभूंय | प्रतिनिधी
जिल्लो वेंचणूक वेवस्थापन आराखडो जातलो तयार
पणजी : विधानसभा वेंचणुके खातीर उत्तर गोंयांतल्या विधानसभा मतदारसंघां खातीर वापर जावपी इलेक्ट्रॉनीक वोटींग मशिनांची (ईव्हीएम) पयल्या पावंड्यावेली तपासणी ३ ते १४ ऑगस्ट मेरेन जातली. वेंचणुके खातीर जिल्हो वेंचणूक वेवस्थापन आराखडो तयार जातलो. जिल्होधिकारी अंकीत यादव हांच्या फुडारपणा खाला बुधवारा बसका जाली. हे बसकेंत विधानसभा वेंचणुकेच्या तयारेविशीं चर्चा जाली, अशी म्हायती जिल्होधिकारी यादव हांणी दिली.
हे बसकेक अतिरिक्त जिल्लोधिकारी गुरूदास देसाय, प्रवीण हिरे परब, उपजिल्लोधिकारी सफल शेट्ये आनी हेर अधिकारी हाजीर आशिल्ले.
वेंचणूके खातीर ईव्हीएम मशिनां, कायदो सुवेवस्था, मनीसबळ, वेंचणुकेचे साहित्य, पोस्टल बॅलट, येरादारीची वेवस्था, स्ट्रॉंग रूम, वेंचणूक अधिकारी आनी कर्मचार्यांक प्रशीक्षण हाचे विशीं चर्चा जाली. जापसालदारीचें वांटप तशेंच गरजेचीं तीं कामां पुराय करपा खातीरची डेडलायन निश्चीत केली. संबंदीत खात्यांकडेन बसका घेवन समन्वय सादपाविशीं गरजेच्यो त्यो सुचोवण्यो जारी जाल्यो.
सगळ्यांत पयलीं उत्तर गोंयांतल्या मतदारसंघां खातीर ज्या ईव्हीएमाचो वापर जातलो ताची तपासणी (फस्ट लेवल चेकींग) करपाचो निर्णय जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
