भांगरभूंय | प्रतिनिधी
चर्चे उपरांत खासगी थारावाचेर विश्वजीत राणे हांचें आस्वासन
पणजी : विधवा बायलां आड गोंयांत कांय कडेन भेदभाव करपी प्रथा आसात. ह्यो प्रथा बंद जावन विधवा बायलांक मानसन्मान मेळपा खातीर फुडल्या अधिवेशनांत कायदो दुरुस्ती जातली. बायलां आनी भुरगीं उदरगत खात्याचे मंत्री विश्वजीत राणे हांणी हें आस्वासन दिलें.
विधवा बायलांक मंगळसुत्र घालपाक मेळना, कांय कडेन तांकां धर्मीक कार्यावळींनी वांटो घेवंक मेळना अशो प्रथा आसात. ह्यो प्रथा बंद जावपा खातीर जागृताय करपा सयत उपाय येवजण करपाची मागणी युरी आलेमांव हांणी केली. हे विशींचो खासगी थाराव तांणी सभाघरांत मांडलो.
थारावाचेर चर्चा जाले उपरांत मंत्री विश्वजीत राणे हांंणी कायद्यांत दुरुस्ती करपाचें आस्वासन दिलें. ह्या आस्वासना उपरांत विरोधी पक्ष फुडारी युरी आलेमांव हांणी खासगी थाराव फाटीं घेतलो. आमदार विरेश बोरकार, डॉ. चंद्रकांत शेट्ये, डिलायला लोबो, डॉ. देविया राणे हांची थारावाचेर उलोवपां जालीं. विधवा बायलां आड कांय कडेन समाजांत भेदभाव जाता. हो भेदभाव कसो आनी खंय जाता हाचो अभ्यास जातलो. भेदभाव पयस करपा खातीर आवश्यक ती कायदो दुरुस्ती येता त्या अधिवेशनांत जातली अशें मंत्री विश्वजीत राणे हांणी सांगलें.
विधवा बायलांक मंगळसुत्र घालपाक मेळना. कांय कडेन तांकां धर्मीक तशेंच भौशीक कार्यावळींनी वांटो घेवंक मेळना. मंगळसुत्र घालचें काय ना हाचो निर्णय ते बायलेन घेवपाक जाय. समाजांत तांचेर सक्ती करपाक जायना, अशें डिलायला लोबो हांणी सांगलें. विधवा बायलां कडेन भेदभाव करचो न्हय, असो थाराव 14 पंचायतींनी घेतला. गोंयांतूच न्हय जाल्यार देशांत विधवा बायलां आड भेदभाव जाता. भेदभाव बंद जावपाक जाय अशें डॉ. चंद्रकांत शेट्ये हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
