भांगरभूंय | प्रतिनिधी
पणजीः विद्यार्थ्यांनी विज्ञानाचे मजतीन संवसारभरांतले सामान्य जनतेक भेकडावपी समस्या सोडोवपा खातीर यत्न करचे, असो उलो मुख्यमंत्री डॉ. प्रमोद सावंत हांणी मारलो. सव्या मनोहर पर्रीकार विज्ञान महोत्सवाच्या उक्तावणा वेळार ते उलयताले. ह्या वेळार अणु ऊर्जा आयोगाचे आदले संचालक डॉ अनिल काकोडकार, प्रा. हाबिल वोजनियाक , एनआयओचे संचालक सुनील कुमार आनी हेर मानेस्त हजर आशिल्ले. ह्या वेळार डॉ. मोहित कुमार जॉली हांकां मनोहर पर्रीकार युवा पुरस्कारान भोवमानीत केले.
गोंयांत विद्यार्थ्यांक बरी टक्केवारी मेळ्ळी काय ते विज्ञान फाट्यांत प्रवेश घेतात. विद्यार्थ्यांनी विज्ञान फांट्यांत करियर नक्की करचें. मात फकत विज्ञानाचो प्राध्यापक वा शिक्षक म्हणून नोकरी करपाचें ध्येय दवरचें न्हय. विज्ञाना कडेन फकत एक विशय म्हणून पळयनासतना बदलाचें, समस्या सोडोवपाचें साधन म्हणून पळोवचें. सध्याचो संवसार हो ज्ञान आधारीत अर्थवेवस्थे कडेन वता. विद्यार्थ्यांनी हाचो फायदो करून घेवचो अशें मुख्यमंत्र्यांनी म्हणलें.
विद्यार्थ्यांनी विज्ञान फाट्यांत स्वताची कल्पकताय वापरून पर्यावरण, भलायकी वा हे खंयच्याय मळार शाश्वत उपाय येवजणीं सोदून काडच्यो. गोंयांक चडांत चड पेटंट मेळचे खातीर यत्न करचे. हातुंतल्यान फकत गोंयांतच न्हय तर देशाक आनी संवसाराकूय फायदो जावचो. स. मनोहर पर्रीकार हे तांच्या विज्ञानीक नदरे खातीर वळखतात. तांचे कडल्यान प्रेरणा घेवन विज्ञानीक निर्माण करप गरजेचें अशेंय तांणी मुखार सांगलें.
गोंयांक विज्ञानीक नवे कल्पनेचें हब करतले
सरकारान हालींच भारतीय विज्ञान संस्था, सीएसआयआर , केंद्र सरकारचे मुखेल विज्ञानीक सल्लागार तशेंच हेर केंद्रीय संस्थां वांगडा समजिकाय कबलात केल्या. हाचे वरवीं गोंयांक विज्ञानीक नव्या कल्पनांचें हब करपा खातीर आमी यत्न करतात, अशें मुख्यमंत्र्यानी म्हणलें.
ह्या वेळार डाॅ. काकोडकार आनी हेर मानेस्तांनीय विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
