भांगरभूंय | प्रतिनिधी
मुख्यमंत्रीः आर्ल सरकारी मुळावे शाळेचे इमारतीचें तशेंच सभाघराचें लोकार्पण
भांगरभूंय । प्रतिनिधी
सावयवेरें: गोंयांतल्या सगळ्या सरकारी शाळांक सरकारा वतीन सगळे तरेच्यो साधनसुविधा दितात. तांचो उपेग करून विद्यार्थ्यांनी आपली मानसीक आनी बौद्धीक उदरगत घडोवन हाडची. गांवगिऱ्या वाठारांत शिक्षण घेतिल्ले विद्यार्थी उच्च सुवातांचेर पावल्यात. गोविंद गावडे आनी आपूण स्वता गांवगिऱ्या वाठारांत मुळावें शिक्षण घेवन आयज गोंयच्या मंत्रीमंडळांत मुख्यमंत्री आनी मंत्री म्हूण काम करतात, अशें मुख्यमंत्री डॉ. प्रमोद सावंत हांणी सांगलें.
केरी पंचायतींतल्या आर्ल वाठारांत सुमार 2 कोटी 11 लाख 70 हजार रुपया खर्च करून आर्ल सरकारी मुळाव्या विद्यालयाची आकर्शक इमारत तशेंच सुसज्ज सभाघर नव्यान बांदलां. ताचें लोकार्पण मुख्यमंत्री डॉ. सावंत हांचे हाजिरेंत बिरेस्तारा जालें. ह्या वेळार ते उलयताले. तांचे वांगडा माचयेर खेळां मंत्री तशेंच प्रियोळचे आमदार गोविंद गावडे, शिक्षण संचालक शैलेश झिंगडे, तिवरें जिल्हो पंचायत वांगडी श्रमेश भोसले, केरीची सरपंच तृप्ती नायक, वळवयचे सरपंच विनायक वेंगुर्लेंकार, वेरें- वाघुर्मेची सरपंच शोभा पेरणी, तिवरें- वरगांवचे सरपंच जयेश नायक, वेलींग- प्रियोळची सरपंच हर्षा गावडे, पंच अश्विनी गावडे, कांचन केरकार, लोचन नायक, पालक- शिक्षक संघाची अध्यक्ष मिलन गावडे हाजीर आशिल्ली.
आर्ल मुळावे शाळेची बांदणी फुडल्या 25 वर्सांचो विचार करून केल्या. ही नवी आकर्शक इमारत पळयले उपरांत ह्या वाठारांतल्या दरेका विद्यार्थ्याक हे शाळेंत शिक्षण घेवचें अशें दिसतलें. स्वामी विवेकानंदाचे विचार आयच्या विद्यार्थ्यांनी आत्मसात करचे. तशेंच पर्यावरणा कडेन विद्यार्थ्यांचो संबंद आसचो, हे खातीर वेगवेगळ्या सुकण्यांचीं चित्रां शाळेच्या वण्टींचेर लायल्यात. विद्यार्थ्यांची सर्वांगी उदरगत जावन ते समाजांतले प्रतिश्ठीत नागरीक जावचे, होच हे फाटलो हेतू आसा, अशें मुख्यमंत्री डॉ. सावंत हांणी सांगलें.
मंत्री गावडे हांणी सांगलें, गोंयचे पयले मुख्यमंत्री भाऊसायब बांदोडकार हांणी गांवगिऱ्या वाठारांतल्या गरीब आनी गरजू विद्यार्थ्यांक शिक्षण मेळचें हे खातीर वाड्या- वाड्यार शाळा सुरू केल्यो. तीच परंपरा फुडें व्हरतना आयचें सरकार गांवगिऱ्या वाठारांतल्या शाळा इमारतींचें नुतनीकरण तशेंच गरजेच्या वाठारांनी नव्यो शाळा इमारती बांदता. ह्या शाळां वांगडाच भोम आनी अमेय वाड्यार बऱ्यो इमारती बांदपाचें काम हातांत घेतलां. माशेलांत लेगीत सुसज्ज शाळा इमारत बांदतले. आयज येरादारी व्हड प्रमाणांत वाडल्या. ताका लागून विद्यार्थ्यांक कसलेच तरेचो धोको उप्रासचो न्हय हे खातीर पालकांनी आपल्या गांवांतले शाळेंत आपल्या भुरग्यांक धाडचे. आयज विद्यार्थ्याक मुल्याधिश्ठीत तशेंच कौशल्यपूर्ण शिक्षण मेळप गरजेचें आसा. ते नदरेन आयचें सरकार यत्न करता, अशें मंत्री गावडे हांणी सांगलें.
सगळ्यांत आदीं फीत सोडोवन शाला इमारतीचें लोकार्पण केलें. ते उपरांत मुख्यमंत्र्यां हस्तुकीं श्री सरस्वती आनी स्वामी विवेकानंद हांचे मुर्तींक फुलांचो हात घालून पुजा केली. विद्यार्थ्यांनी येवकार गीत सादर केले उपरांत दिवली पेटोवन सुवाळ्याचें उक्तावण केलें. प्रास्तावीक आनी सुत्रसंचालन युगांक नायक हांणी केलें. केशव केरकार हांणी उपकार मानले.
भुरग्यांक गांवांतले शाळेंत धाडचेः मुख्यमंत्री
गांवगिऱ्या वाठारांत घेतिल्ल्या शिक्षणांतल्यान विद्यार्थी देशाच्या उच्च सुवातेर पावपाक शकतले. हे खातीर गांवांतल्या पालकांनी आपल्या भुरग्यांक अश्या शाळांनी धाडपाक जाय. हे आदीं आशिल्ल्या विद्यार्थ्यांचे पटसंख्ये परस फुडल्या वर्सा ही पटसंख्या दुपेट जावपाक जाय. गांवगिऱ्या वाठारांतल्या शाळांतले शिक्षक योग्य मार्गदर्शना वांगडाच भुरग्यांचेरबरे संस्कार लेगीत करतात. हे खातीर पालकांनी स्वताचो वेळ आनी पयसो खर्च करून शार वाठारांत आपल्या भुरग्यांक धाडचे बदला गांवगिऱ्या वाठारांतल्या शाळांनी धाडचे, अशें मुख्यमंत्रान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
