विद्यार्थ्यांनी कौटिल्याचें अर्थशास्त्र वाचचें

भांगरभूंय | प्रतिनिधी

भूषण सावयकारः केपें म्हाविद्यालयांत अर्थमंथन प्रस्नमंजुशा उमेदीन

भांगरभूंय । खबरां मेज

पणजीः पर्यावरणाचेर वायट परिणाम जावचो ना हाची जतनाय घेवन अर्थीक उदरगतीक चालना दिवची. अर्थीक पांवड्यार घटसाण हाडपाची आसत जाल्यार विद्यार्थ्यांनी कौटिल्याचें अर्थशास्त्र वाचचें, अशें उच्च शिक्षण संचालनालयाचे संचालक भूषण सावयकार हांणी सांगलें.

केपेंच्या कला, वाणिज्य आनी विज्ञान सरकारी म्हाविद्यालयाच्या अर्थशास्त्र विभागान आयोजीत केल्ल्या अर्थमंथन 0.4 हे राज्य पांवड्या वयले आंतर म्हाविद्यालयीन प्रस्नमंजुसा सर्तीच्या इनामां भेटवण सुवाळ्यांत सावयकार उलयताले. ह्या वेळार माचयेर म्हाविद्यालयाचे प्रभारी प्राचार्य डॉ. जॉयदीप भट्टाचार्य, उपसंचालक डॉ. रेंजी जॉर्ज अंबलूर, डॉ. विक्रांत मुदलियार, प्रा. कृष्णकुमार बांडोळकार हाजीर आशिल्ले.

ह्या वेळार अर्थशास्त्र विभागाच्या सस्टेनेबिलिटी सेलाच्या फुडाकारान टुवर्डस् अ सस्टेनेबल फ्युचरः एक्सप्लोरींग क्लायमेट चेंज, ग्लोबल वॉर्मींग आनी कार्बनफ्रुटप्रिंट्स ह्या माथाळ्याच्या ई बुकाचें प्रकाशन केलें.

प्रस्न मंजुशेचो फायदो फक्त वांटो घेतिल्ल्यांकूच जाता अशें ना, जाल्यार प्रेक्षकांच्या गिन्यानांत लेगीत भर पडटा. ताका लागून अशे सर्तीचें म्हत्व खूब व्हड आसा. विद्यार्थ्यांनी सक्रीय तरेन अशे सर्तींनी वांटो घेवचो, अशें डॉ. जॉयदीप भट्टाचार्य हांणी सांगलें.

प्रस्न मंजुशेचे मुळावे फेरये खातीर गोंयांतल्या 13 म्हाविद्यालयांनी वांटो घेतलो. तातूंतल्या पांच म्हाविद्यालयांची निवड अंतीम फेरये खातीर जाली. अर्थशास्त्र विभागांतले डॉ. विक्रांत मुदलियार, प्रा. कृष्णकुमार बांडोळकार हांणी प्रस्नमंजुशा मास्टराची भुमिका सांबाळ्ळी.

मडगांवच्या श्री दामोदर विद्यालयाक वस्तादपण

मडगांवच्या श्री दामोदर कॉलेज ऑफ कॉमर्स अ‍ॅण्ड इकॉनॉमिक्साचे एर्वील हिल्मामो बॅरेटो वाझ रॉड्रिगीश आनी वैभव चेतन बांदोडकार हांणी पयलें इनाम मेळयलें. कला, विज्ञान आनी वाणिज्य सरकारी म्हाविद्यालय खांडोळेची वीणा एम आनी प्रवीण कर्ण हांकां दुसरें, जाल्यार रोझरी कॉलेज ऑफ कॉमर्स अ‍ॅण्ड आर्ट्स नावेलीच्या हॅस्टर कार्दोझो आनी पियुष अग्रवाल हांकां तिसरें इनाम फावो जालें. उमेद वाडोवपी इनाम सेंट झेवियर कॉलेज म्हापशें आनी श्रीधर काकुलो म्हाविद्यालय म्हापशें हांकां जाहीर जालें.