भांगरभूंय | प्रतिनिधी
अनिल सामंत: ज्ञान प्रकाश उच्च माध्यमीक शाळेंत युवा सप्तक उमेदीन मनयलें
दिवचल ः जेन्ना जेन्ना तुमकां जिणेंत कांयच करचें अशें दिसना तेन्ना विवेकानंदाचो फोटो पळयात आनी मागीर हारशांत स्वताक पळयात. फरक तुमकां निश्चीतूच जाणवतलो. विवेकानंदाचें निराश, हतबल, कंटाळिल्लें तोंड फोटोंत केन्नाच दिसचें ना. उरफाटें तांच्या तोंडावयलें सूख, उदासीन मनांत उर्जा पळोवपाक मेळटली. विद्यार्थ्यांनी आपल्या व्यक्तीमत्वाचे उदरगती खातीर मेहनत घेवची. आपल्या व्यक्तीमत्वाचे उदरगती खातीर विद्यार्थ्यांनी ’ध्यास, अभ्यास आनी श्वास’ ही शिकवण सदांच मतींत दवरची, अशें प्राचार्य अनील सामंत हांणी ‘स्वामी विवेकानंद आनी आयचे विद्यार्थी’ ह्या विशयाचेर उलयतना सांगलें.
सगळेकडेन काळोख जालो तेन्ना आमच्या देशांत एक सूर्य स्वामी विवेकानंदाच्या रुपान जल्माक आयलो. तांचो जल्म जालो त्या देशांत आमी जल्मले हें आमचें नशीब. अशें म्हणत विवेकानंदाच्या विचारांक लागून विद्यार्थ्यांच्या जिविताक कसो आकार मेळूंक शकता हाचेर ताणें प्राचार्य सामंत हांणी सांगलें.
स्वामी विवेकानंद सप्तकाच्या समारोपाच्या निमतान आयोजीत केल्ले कार्यावळीक मुखेल सोयरे प्राचार्य अनिल सामंत हांचे वांगडा संस्थेची अध्यक्ष प्रिया राऊत, प्राचार्य लक्ष्मीकांत परब, पुर्णिमा केरकार आनी स्नेहल पाडलोस्कार माचयेर हाजीर आशिल्लेें. दिवली पेटोवन कार्यावळीचें उक्तावण जालें.
ह्या दिसा निमतान ‘उर्जा’ ह्या वणटीपत्रकाचें अनावरण सामंत हांचे हस्तुकीं जालें.
ह्या वेळार विद्यार्थ्यांक स्नेहा सुतार हांणी मार्गदर्शन केलें. शिक्षिका स्नेहल पाडलोस्कर हांणी मानेस्तांची वळख करून दिली. सुरेख वडेंकार, निहिरा नायक हांणी मानेस्तांक फुलांचे तुरे भेटयले. पुराय कार्यावळीचें सुत्रसंचालन शिक्षिका स्नेहा सुतार हांणी केलें. हम होंगे कामयाब ह्या गीतान कार्यावळीचो शेवट जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
