भांगरभूंय | प्रतिनिधी
21 जूनाक पुराय गोंयांत योगाच्यो कार्यावळी
पणजी, प्रतिनिधी : विद्यार्थ्यांक विद्यालयांत योग शिकोपाची सरकाराची तयारी आसा. प्रस्ताव आयल्यार योग शिक्षकाची वेवस्था सरकार करतलो, अशें मुख्यमंत्री डॉ. प्रमोद सावंत हांणी स्पश्ट केले. दर वर्सा प्रमाण अंदूंय पुराय राज्यांत 21 जूनाक संवसारीक योग दिसाच्यो कार्यावळी जातल्यो. अंदूंच्या योगा दिसाक मिलेटाच्या (भरड धान्य) प्रसाराचेर भर आसतलो, अशें मुख्यमंत्र्यांन सांगलें.
दर वर्सा संवसारात 21 जून हो योग दीस मनयतात. पुराय देशांत योगासनाच्यो कार्यावळी जातात. गोंयातली मुखेल कार्यावळ 21 जूनाक सकाळीं 6.30 वरांचेर ताळगांवच्या डॉ. श्यामाप्रसाद मुखर्जी स्टेडियमाचेर जातली. हे कार्यावळीक मुख्यमंत्र्यां सयत हेर मानेस्तांची हाजेरी आसतली. दरेकी म्हालांत एक मुखेल कार्यावळ जातली. तिका मंत्री, आमदारांची उपस्थिती आसतली. विद्यालयां तशेच हेर संस्थांनी कार्यावळी जातल्यो. पतंजली योग समिती तशेंच हेर संस्थांच्या सहकार्यान मुखेल कार्यावळीचें आयोजन केलां.
दरेकल्याक तशेंच समाजाच्या भलायके खातीर योगासनां करपाची गरज आसा. अंदूंच्यो योग दिसाक मिलेटाचो प्रसार जातलो. मिलेटा मदीं नासण्याचो वापर खूब जाता. हेर धान्याचो जायना, अशें मुख्यमंत्री डॉ. सावंत हांणी सांगलें.
विद्यार्थ्यांक योगा शिकोपाची सरकाराची तयारी आसा. योगासनाचो एक विशय आसपाक कसलीच हरकत ना. योग शिकोवपा खातीर आमी शिक्षकांक प्रशिक्षण दितले. सध्या राज्यांत 250 ते 300 सुवातींनी योगाचे वर्ग सुरू आसा, अशें मुख्यमंत्र्यांन सांगलें.
मदले सुटयेतल्या खाणांत मिलेट
मदले सुटयेतल्या खाणांत मिलेटाचो (भरड धान्य) वापर जातलो. आप मजत गटांक मिलेटा पसून पदार्थ तयार करपाचे प्रशिक्षण दितले, अशें मुख्यमंत्री सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
