विद्यार्थी वळटात आयटीआय वटेन

भांगरभूंय | प्रतिनिधी

धावेंत 70 टक्के मेळयिल्ल्या 300 तर 60 टक्के गूण मेळयिल्ल्या 1,044 जाणांनी घेतलो प्रवेश

पणजी: गोंय सरकारान कुशळटाय विकासाक दिल्लें प्रोत्साहन आनी काळाची गरज वळखून आयटीआयंत सुरू केल्ले नवे कोर्स हांकां लागून गोंयचे विद्यार्थी आयटीआय कडेन वळत आशिल्ल्याचें कुशळटाय विकास खात्यान ‘भांगरभूंय’ कडेन दिल्ल्या आंकड्यांतल्यान मुखार आयल्या.
फाटल्या वर्सा धावेंत 60 टक्के गूण मेळयिल्ले 879 विद्यार्थ्यांनी आयटीआयंत प्रवेश घेतिल्लो. अंदूं हो आंकडो 1,044 इतलो जाला. फाटल्या वर्सा 70 टक्के गूण मेळयिल्ले 245 विद्यार्थी आयटीआय कडेन वळिल्ले. अंदूं 70 टक्के गूण मेळयिल्ले 300 विद्यार्थ्यांनी आयटीआयंत प्रवेश घेतला. जाल्यार बारावी पास जाल्ल्या 55 विद्यार्थ्यांक अंदूं आयटीआयक पसंती दिल्ल्याचें आंकड्या वेल्यान दिसून येता.
हाचे पयलीं धावी, बारावी पास जाल्यार आयटीआय कडेन पर्याय म्हूण पळयताले. तशेंच टर्नर, फिटर, वेल्डर, प्लंबर, इलेक्ट्रिशीयन अश्या मेजक्याच विशयांचें प्रशिक्षणूय मेळटालें. आयटीआय जाल्ल्या विद्यार्थ्याक नोकरेंत विशेश स्थान मेळनाशिल्लें.
पूण आतां आयटीआयंत ड्रोन टेक्निशीयन, ई-व्हेईकल मेकॅनीक, होम अप्लायन्सेस, 3 डी प्रिंटींग, आयओटीएस, अ‍ॅडव्हान्स प्लंबींग अशे नवेनवे कोर्स सुरू केल्यात. तेचबरोबर ‘स्वयंपूर्ण गोंय 2.0’ मोहिमेच्या केंद्र स्थानार कुशळटाय विकास दवरून मुख्यमंत्री डॉ. प्रमोद सावंत हांणी ते खातीर यत्न सुरू केल्यात. तरणाट्यांनी नोकरे परस आपरोजगाराक प्राधान्य दिवन अर्थीक हीत साद्य करचें, हे खातीर तांचे यत्न सुरू आसात. कुशळटाय विकासा विशीं राज्यभर व्हड प्रमाणांत जागृताय करतात. ताका लागून विद्यार्थी व्हड संख्येन आयटीआय कडेन वळटात अशी म्हायती कुशळटाय विकास खात्याचे संचालक एस. एस. गांवकार हांणी दिली.
सद्याचे स्थितींत 42 परस चड विशयांचें प्रशिक्षण आयटीआयंतल्यान दितात. तशेंच व्हड व्हड कंपनींनीय आयटीआयंतल्यान शिक्षण घेतिल्ल्या विद्यार्थ्यांक प्राधान्य दितात. नोकरी मेळ्ळी ना जाल्यार आंगात कला आशिल्ल्यान आयटीआय केल्ले तरणाटे स्वताचो रोजगारूय सुरू करतात.

पयलीं धावेंत, बारावेंत विशेश श्रेणींत पास जावपी विद्यार्थ्यांची ओड उच्च शिक्षणा कडेन आसताली. दोतोर, इंजिनियर, वकील जावपा खातीर सर्ती लागतल्यो. इंजिनियरिंगा खातीर आयटीआयक लागीं केल्ल्याचें स्पश्टपणान दिसून आयिल्ल्याचें तांणी नमूद केलें.

गोंयांत सद्या हजारांनी उच्च शिक्षीत तरणाटे बेरोजगार आसात. नाय म्हणल्यार खूबशे जाण उच्च शिक्षण घेवन लेगीत उण्या पगाराचेर काम करतात. जाल्यार दुसरे वटेन आयटीआय जाल्ल्या तरणाट्यांक गोंयांतल्यो आनी गोंया भायल्यो कंपनीं आपोवन घेत आसात. ताका लागून आयटीआय कडेन पळोवपाचो विद्यार्थ्यांचो दृश्टीकोन बदलत आशिल्ल्याचें चित्र फाटल्या तीन वर्सांत दिसून येता.