भांगरभूंय | प्रतिनिधी
मेस कंत्राटदार निलंबीत, भाजयुमो वतीन मोर्चो
भांगरभूंय । प्रतिनिधी
पणजी : गोंय विद्यापिठाच्या हॉस्टेल मेसाच्या जेवणांत किडी सांपडिल्ल्या प्रकरणांत संबंदीत कंत्राटदाराक निलंबीत केला. हाचे मुखार परतून ताका कंत्राट मेळचें न्हय हे खातीर ताका काळे वळेरेंत घातला. ह्या प्रकरणांत खोलायेन चवकशी करचे कातीर समिती नेमतले. सोमार मेरेन विद्यापीट वाठारांतल हेर दोन कॅण्टीनां सुरू करतले, अशी म्हायती विद्यापिठाचे रजिस्ट्रार सुंदर धुरी हांणी दिल्या.
फाटले दोन दीस विवीध विद्यार्थी संघटनांनी ह्या प्रकरणांत कारवाय करपाची मागणी केल्ली.
धुरी हांणी सांगलें, बिरेस्तारा मेसच्या जेवणांत किडी आनी ताचीं तांतया सांपडिल्लीं. आपणे लेगीत जेवणांतल्यो किडी पळयल्ल्यो. हो प्रकार खऱ्यांनी दुर्दैवी आसा. हे उपरांत आमी कालूच कंत्राटदाराक कारणां दाखय नोटीस धाडून दंड दिल्लो. शुक्रारा सकाळीं बसका घेतली. आमकां विद्यार्थ्यांच्या भलेयके कडेन खेळ करपाचो ना. ते खातीर आमी कंत्राटदाराक कायमस्वरुपी निलंबीत करून ताका काळे वळेरेंत घातला. विद्यापिठांतल्या हेर दोन कॅण्टीनाचें काम थळाव्या आपमजत गटांक दितले. हीं दोनूय कॅण्टीनां सोमास सावन सुरू जातलीं.
कंत्राटदाराक काडिल्ल्यान कांय दीस मेस बंद आसतलें, मात ताका लागून पयशे भरिल्ल्या विद्यार्थ्यांचें अर्थीक लुकसाण जावचें ना, हाची जतनाय घेतले. फुडल्या सप्तका मेरेन ही मेस चलोवपाक नवो कंत्राटदार घेतले. ह्या प्रकरणांत कॅण्टीन समितीच्या वांगडी सचिवाक लेगीत कारणां दाखय नोटीस जारी करतले. फुडारांत हॉस्टेल वॉर्डन, कॅण्टीन समितीच्या वांगड्यांनी मेस, कॅण्टीनाक सद्दां भेट दिवपाचे निर्देश दितले. तशेंच आपूण स्वता लेगीत ह्या कॅण्टीनांत वचून तपासणी करपाचो निर्णय घेतला, अशें धुरी हांणी सांगलें. ताचे आदीं भारतीय जनता युवा मोर्चा वतीन ठिय्या आंदोलन केलें. हे विशीं संघटनेचे अध्यक्ष तुषार केळकार हांणी सांगलें, फाटलीं तीन वर्सां ह्या हॉस्टेल मेसच्या जेवणा संबंदांत कागाली येतात. आमकां मेळिल्ले म्हायती प्रमाण अन्न आनी वखदां प्रशासनान स म्हयन्यां आदीं ह्या मेसाचेर धाड घातिल्ली. त्या वेळार कंत्राटदारान खूबशे नेम मोडिल्ल्याचें स्पस्ट जाल्लें. मात, विद्यापिठान ताचेर कारवाय करूंक ना. ह्या प्रकरणांत कॅम्पस समितीच्या वांगड्यांची लेगीत चवकशी जावपाक जाय. आमचे खातीर राजकारणा परस विद्यार्थ्यांची भलायकी म्हत्वाची आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
