भांगरभूंय | प्रतिनिधी
भारताचो ग्रॅण्डमास्टर विदीत गुजराथीन फाटले फेरयेंत मेळिल्ले हारीतल्यान स्वताक सांबाळून नेटान पुनरागमन केलें आनी कॅण्डिडेट्स बुद्दीबळ सर्तीचे णववे फेरयेंत अमेरिकेच्या दुसऱ्या मानांकीत हिकारू नाकामुराक हारयलो. हे सर्तींत विदीताचें नाकामुरा आड दुसरें जैत थारलें. उक्त्या गटांतल्यो हेर तिनूय लडती बरोबरींत सुटल्यो. हातूंत डी गुकेश आनी आर प्रज्ञानंद ह्या भारतांच्या ग्रॅण्डमास्टरां मदले लडतीचो आस्पाव आसा.
रशियेच्या इयान नेपोम्नियाशीक फ्रान्साच्या अलिरेझा फिरौझा आड बरोबरीचेर समाधान मानचें पडलें. जाल्यार अझरबैजानाच्या निजात अबासोवान अमेरिकेच्या फॅबियानो कारुआनाक बरोबरींत आडायलो.
सर्तीच्यो पांच फेरयो बाकी आसा. सध्या गुकेश आनी नेपोम्नियाशी दरेकी 5.5 गुणां सयत जोड रितीन पयले सुवातेर आसा. प्रज्ञानंद तांच्या परस फकत अर्द्या गुणान फाटीं आसा. नाकामुरा, विदीत आनी कारुआना 4.5 गुणां सयत जोड रितीन चवथे सुवातेर आसात. फिरौझा 3.5 गुणां सयत सातवे, जाल्यार अबासोव तीन गुणां सयत आठवे सुवातेर आसा.
पयल्या टप्प्यांत नाकामुराक हारोवपी विदीतान दुसऱ्या टप्प्यांत लेगीत उत्कृश्ट खेळ केलो. आठवे फेरयेंत गुकेशा आड हारल्या उपरांत णववे फेरयेंत लेगीत विदीतान इटालीयन पद्दतीनूच सुरवात केली. ते उपरांत विदीतान बऱ्यो चालू रचून नाकामुराक अडचणीत हाडलो. हातूंतल्यान नाकामुराक भायर सरपाक जमलें ना आनी अखेरेक ताणें हार मान्य केली.
प्रज्ञानंद आनी गुकेश हांणी एकामेका आड बरो खेळ केलो. अखेरेक दोगांयनी जैताची संद नाशिल्ल्यान 41वे चाली उपरांत बरोबरींत समाधान मानलें.
फिरौझा आड काळ्या घुलांनी खेळपी नेपोम्नियाशी अचडणींत आशिल्लो. पूण, कठीण स्थितीतल्यान भायर येत डाव बरोबरींत सोडोवपाक ताका येस आयलें. आनीक एका डावांत अबासोवान धव्या घुलांनी खेळटना कारुआनाक कसलीच संद दिवंक ना. अखेरेक ही लडत लेगीत बादाबाद उरली.
बायलांच्या गटांत भारताचे आर वैशालीक चीनाचे टॅन झोंगीन फकत 21 चालींनी हारयली. वैशालीची ही सेगीत चवथी हार आशिल्ली. दुसरे वटेन ह्या जैतान झोंगीन स गुणां सयत आघाडी मेळयली. झोंगी आनी वैशाली ही लडत सोडली जाल्यार हेर तीन लडती बादाबाद उरल्यो. भारतान आनीक ग्रॅण्डमास्टर कोनेरू हम्पीन रशियेचे कॅटेलिना लायनोक आडायली. णववे फेरये उपरांत ले टिंगजी आनी अलेक्झांड्रा गोर्याचकिना 5.5 गुणां सयत जोड रितीन दुसरे सुवातेर आसात. लायनो पांच गुणां सयत चवथे सुवातेर आसा. हम्पी आनी नुरग्युल सलिमोवा चार गुणां सयत जोड रितीन पांचवे सुवातेर आसा. अॅना मुझिचूक 3.5 गुणां सयत सातवे सुवातेर आनी वैशाली 2.5 गुणां सयत निमाणे म्हणल्यार आठवे सुवातेर आसा.
फिरौझाचो पंचांचेर आरोप
आपल्याक पंचांनी विचलीत केलें असो आरोप अलिरेझा फिरौझान केला. बुद्दीबळा परस फॅशनाचेर लक्ष केंद्रीत करपी फिरोझान आवाज करपी बूट घातिल्ले. ताचो हेर खेळगड्यांक त्रास जातलो म्हणून बूट बदल वा सगल्याक भोंवंक नाका अशें पंचांनी ताका सांगलें. ताका लागू आपूण विचलीत जालो अशें फिरौझान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
