भांगरभूंय | प्रतिनिधी
पणजी : कला आनी संस्कृती संचालनालय, पर्यटन खातें, पर्यटन विकास म्हामंडळ, म्हायती आनी प्रसिद्धी खातें, दीपावली उत्सव समिती आनी श्री विठ्ठल देवस्थान समिती हांच्या सहकार्यान १५ नोव्हेंबराक विठ्ठलापूर- सांखळे त्रिपुरारी पुनव उत्सव मनयतले.
मुख्यमंत्री डॉ. प्रमोद सावंत, विठ्ठल पंचायतन देवस्थानचे अध्यक्ष प्रतापसिंह रावजी राणे, पर्यटनमंत्री रोहन खंवटे, पर्यटन विकास म्हामंडळाचे अध्यक्ष डॉ. गणेश गांवकार, गोंय राज्य बागायत म्हामंडळाचे अध्यक्ष प्रेमेंद्र शेट, गोंय रानां विकास म्हामंडळाची अध्यक्ष देविया राणे, कारापूर सर्वणाची सरपंच सिद्धी परब, दीपावली उत्सव समितीची अध्यक्ष तन्वी सावंत, दिनेश उसपकार आनी हेर मानेस्त ह्या वेळार हजर रावतले.
त्रिपुरारी पुनवेच्या उत्सवा निमतान विंगड विंगड कार्यावळींचें आयोजन करतले. म्हायती आनी प्रसिद्धी खात्या वतीन स्वयंपूर्ण गोंय विशयाचेर फोटो प्रदर्शन आयोजीत करतले. सांजेच्या ७ वरांचेर भगवान श्रीकृष्ण मिरवणूक, उपरांत व्हाळवाट न्हंयेच्या पात्रांत दिवे सोडटले. ७.३० वरांचेर पांडुरंग देवस्थानाच्या वाठारांत सांस्कृतीक कार्यावळी, रातच्या १०.३० वरांचेर श्री विठ्ठल-रखुमाईची पालखी मिरवणूक आनी उपरांत पारंपरीक सरंगे (आकाशदिव्या सारको दिवो) मळबांत सोडपाची कार्यावळ जातली. परंपारीक नौकाविहार सर्त रातच्या १०.३० ते १२ वरां मेरेन जातली. न्हंयेच्या पात्रांत जावपी नौकाविहार सर्त ही उत्सवाचें खाशेलें आकर्शण आसा आनी गोंयां सयत शेजारच्या राज्यांतल्यान हजारांनी भावीक ही सर्त पळोवपाक येतात. नौकाविहार सर्तींत पर्यावरणपूरक बोटी वांटेकार जातात.
नौकाविहार सर्ती खातीर पयलें इनाम ३५ हजार रूपया आनी घोळटो करंड, दुसरें इनाम ३० हजार रूपया आनी करंड, तिसरे इनाम २५ हजार रूपया आनी करंड, चवथें इनाम २० हजार रूपया आनी प्रशस्तीपत्र, पांचवें इनाम १५ हजार रूपया आनी प्रशस्तीपत्र तशेंच दरेकी ८ हजारांची पांच उमेद वाडोवपी इनामां दितले. तशेंच १० बोटींक दरेकी ५ हजारांचें मानधन आनी उरिल्ल्या सगळ्या सर्तींत वांटो घेतिल्ल्या पंगडांक दरेकी ४ हजार रूपया दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
