विज्ञान फाट्याच्या विद्यार्थ्यां खातीर

भांगरभूंय | प्रतिनिधी

हालींच आमी दरवर्सा प्रमाण विज्ञान दीस मनयलो. आतां बारावेचे विद्यार्थी आपली दुसरी भौशीक परीक्षा दितात आनी ताच्या उपरांत नव्या शिक्षणिक येवजणे सकयल ते खंयच्या तरी कॉलेजान प्रवेश घेतले. हें जरी खरें आसलें तरी विज्ञान फांट्यान प्रवेश घेवपी इत्सुक विद्यार्थ्यांक विज्ञान फाट्याक उपेगी पडपी देशांतल्या संस्थांची म्हायती जाय. गोंयांत जशी दोनापावला एनआयओ आसा तशी बंगळुर शारांत भारतीय विज्ञान संस्था म्हळ्यार इंडियन इन्स्टिट्यूट ऑफ सायन्स आसा. आयआयसी म्हूण तिची वळख आसा. आतां जरी प्रत्येक संस्थेचीं संकेतथळां आसलीं तरी हे संस्थेक तुमी प्रत्यक्ष भेट दिवची, अशी विनवणी. पेपर सोंपलो काय निकाल लाग मेरेन तुमचे लागीं वेळ आसता. त्या वेळांत तुमी हें काम करू शकतात. बरेच फावट संस्था प्रत्यक्ष पळयले उपरांत तुमका थंय शिकचें कशें दिसूं शकता.
आमी शिकता कित्याक? चडशा जाणांचें उत्तर आसतलें की आमकां फाव ती नोकरी मेळपाक जाय म्हूण. हातून तांची कितेंच चूक आसा अशें दिसना. हालींच गोंयांत गुंतवणूक उर्बा मंडळाची बसका जाली. तातूंन नवे उद्देग गोंयांत येवपाचे आसात हाचेर चर्चा जाली आनी 310 कोटींच्या उद्देगांक सरकारान परवानगी दिली. हें चित्र नोकरी मेळपा खातीर बरें आसा, अशें म्हणू येता. हातून हॉटेलांक लागीं आशिल्ले उद्देग आसात काय आनीक कसले हें अजून कळूंक ना. आसूं. तुमी विद्यार्थी मात्र परिक्षा बऱ्या गुणांनी पास जातले, हें ध्येय दवरात. बरेच फावट राज्याचो गरजो कितें आसात, तें पळयताच अशें ना. सर्वेक्षण करता अशें ना, म्हूण तर मार्गदर्शन घेवपाची गरज आसता. तुमी जर विज्ञान फाट्यान वचूंक सोदतात तर देशातल्या नामनेच्या संस्थांची म्हायती घेवपाक जाय. हें काम तुमी संकेतस्थळाक भेट दिवन आनी मागीर शक्य जाता जाल्यार प्रत्यक्ष भेट दिवन करू येता.
अशीच एक नामनेची संस्था म्हळ्यार बंगळुरूची आयआयसी ही संस्था. भारत देश स्वतंत्र जावचे पयली सुरु जाली हें आमकां खबर आसा अशें ना. जायत्या लोकांचो समज आसा की देश स्वतंत्र जाले उपरांतूच भोवतेक संस्था सुरु जाल्यो. 1909 सालांत ही संस्था सुरु जाली. ती सुरु करपाक सर जमशेटजी टाटा हांणी फुडाकार घेतलो. डॉ सी वि रामन, होमी भाभा, विक्रम साराभाई, सर मोक्षगुंडम विश्वेवरय्या, सतीश धवन, डॉ ए पी जे कलाम सारखे व्हड विज्ञानिकांचे योगदान हे संस्थेक आसा. हातून शिक्षण दितात तातूंन अंतरिक्ष अभियांत्रिकी, संगणकशास्त्र, भौतिकशास्त्र, रसायन शास्त्र सारक्या विशयांचो आस्पाव आसा. फक्त आमच्या देशांनुच न्हय तर अख्क्या संवसारान तिका मान आसा. हांच्या संकेतस्थळाचेर पदवी उपरांतच्या सगळ्या अभ्यासक्रमांची म्हायती आसता. तशेंच कोणे खंयचो विशय घेतलो आनी खंयचीं पुस्तकां तुमी वापरातात हाची म्हायती लेगीत हांगां मेळटा. कल्पना शक्तीक प्रोत्साहन दिवपी गणित विशयाचो अभ्यास तुमी हांगां करूं शकतात. ऑनलायन अर्ज करपाची तजवीज लेगीत आसा. सोमार ते शुक्रार ह्या दिसांनी सकाळी 9.30 ते 5.30 मेरेन हांचें कार्यालय उक्तें आसता. (फोन : 0802293-3379/3558/3726) ह्या नंबराचो तुमी आधार घेवं शकतात. खेरीज मेलुय करूं शकतात. 1. [email protected] ( for programme related queries)

  1. [email protected] (for admission fee/application) खातीर https://iisc.ac.in/ ह्या संकेतस्थळाक भेट दिवन तुमी म्हायती घेवं शकतात, हें जरी खरे आसलें तरी तुमी हे संस्थेक जरूर भेट दिवची. गोंयांत कार्यरत आशिल्ल्या दोना पावलाच्या एनआयओचें लेगीत संकेतथळ आसा, पूण ताका तुमी जरूर प्रत्यक्ष भेट दियात. हांगां विज्ञान फाट्यांच्या विद्यार्थ्यांक जायत्यो संदी आसता. ताची म्हायती घेवची. तांचें संकेतस्थळ आसा ( https://www.nio.org/). तुमची आवड विज्ञान फाटो आसा तर मुद्दाम ही म्हायती घेवची.
  2. प्रा रामदास केळकार
  3. 9822583275