विक्रम: पयलेच फावट मोरजे १९७ दर्या कांसवांनी घालीं १९ हजारां परस चड तांतयां
भांगरभूंय | प्रतिनिधी
पेडणें, प्रतिनिधी: मोरजेच्या २२ वर्सांच्या इतिहासांत पयलेच फावट टेंबवाडो दर्यादेग वाठारांत वट्ट १९७ दर्या कांसवांनी १९ हजारां परस चड तांतयां घालीं. ह्या हंगामांत ३५ कांसवांची सुमार १२०० पिलां दर्यांत सोडपाक रान खात्याक येस आयलां. कसलेच तरेचें आवाजाचें प्रदुशण ह्या कांसवांचेर जावंक ना.
अंदूं व्हडा प्रमाणांत अदीं मदीं आवाजाचें प्रदुशण जातालें. मात ताचो मात्तूय परिणाम कांसवांचेर जावंक ना. फाटल्या वर्सा ६० परस चड कांसव आयिल्ले. मात अंदूं ताचे परस तीन पटींनी चड म्हळ्यार १९७ दर्यांतल्या कांसवांनी येवन हांगा तांतयां घालपाचो विक्रम केलो. रान खातें आनी रान कर्मचार्यांनी ही मोहीम थळावे वेवसायीक, नागरीक हांच्या सहकार्यांतल्यान येसस्वी केली.
रान विभागा खाला १९९७ वर्सा सावन मोरजे दर्यादेग वाठारांत दर्याचे कांसव संवर्धन मोहीम राबयता. उपरांत २००० वर्सा तेन्नाचे मुख्यमंत्री मनोहर पर्रीकर हांणी कांसव संवर्धन मोहिमे खातीर दर्यादेग वाठारांतली पांचशें चौरस मिटर जमीन आरक्षीत करून रान विभागाच्या ताब्यांत दिल्ली. २४ वरां कर्मचारी कामगाराची नियुक्ती करून ही कांसव संवर्धन मोहीम आजूय येसस्वीपणान चलता. आतां मेरेनच्या इतिहासांत हे दर्यादेगेर आयिल्ले हे सगळ्यांत चड कांसव.
ह्या वाठारांत हंगामी स्वरूपाचें अभ्यास केंद्र उबारलां. हालींच रानमंत्री विश्वजीत राणे हांणी हांगां भेट दिली आनी प्रस्न आयकून घेतले. तशेंच थळाव्या वेवसायिकां कडेन संपर्क साधून तांणी ही मोहीम राबयतना पर्यटन हंगामांत हे मोहिमेचे कसलेच त्रास जावचे नात. ताका लागून फुडाराक रानखातें, पर्यटन खातें आनी वन्य विभाग हाची जोड बसका घेवन थळाव्या शॅक वेवसायिकांक सुरक्षा दिवपाचे नदरेन एक वेगळी येवजण आखपाचें आस्वासन दिल्लें. ह्या वाठारांत पक्कें अभ्यास केंद्र उबारपाची घोशणाय तांणी केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
