भांगरभूंय | प्रतिनिधी
अन्न आनी वखदां प्रशासनाची कारवाय
वास्को: अन्न आनी वखदां प्रशासनान चवथीचे फाटभुंयेर अंमलबजावणी मोहीम राबयतना मुरगांव म्हालांतल्या कांय मिठाय दुकानांची तपासणी केली. वास्को शार वाठारांतल्या मिठाय दुकानांची तपासणी केली तेन्ना योग्य लेबलां नाशिल्ली आनी नितळसाण नाशिल्ले सुवातेर सांठोवन दवरिल्ली 90 कील मिठाय जप्त केली.
वरिश्ठ अन्न सुरक्षा अधिकारी शैलेश शेणवी, अन्न सुरक्षा अधिकारी अंकिता पालयेंकार, आत्माराम नायक, अधिकारी संज्योत कुडाळकार हांणी सदर अंमलबजावणी मोहीम राबयली.
तांणी वास्को शारांतल्या सगल्या मिठाय दुकानांतली मिठायेची तपासणी केली. तांणी सदर मिठाय केन्ना तयार केल्या हे संबंदीच्या तारखेची तपासणी केली. तेन्ना कांय कडेन ती नमूद करूंक नाशिल्ल्याचें दिसून आयलें. तशेंच तांकां कांय दुकानांनी मिठाय तयार करतना नितळसाण दिसून आयली ना. ह्या वेळार 90 कील बर्फी ताब्यांत घेतली. हे बर्फीतले कांय नमुने घेतले उपरांत विक्रेत्यांनी स्वता ती बर्फी नश्ट करपाची तयारी दाखोवन ती नश्ट केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
