भांगरभूंय | प्रतिनिधी
वास्को: मुरगांव म्हाल नागरीक शिगमोत्सव समितीन गोंय पर्यटन खात्याच्या पालवान आयोजीत केल्ल्या रोमटामेळ, चित्ररथ मिरवणुकेक लोकांनी व्हड प्रमाणांत प्रतिसाद दिलो. चित्ररथ पळोवपा खातीर लोकांनी स्वातंत्र्य पथार दोनूय वटांनी गर्दी केल्ली.
चित्ररथाक सेंट अँड्रयू चर्ची मुखा वेल्यान सुरवात जाली. जाल्यार रोमटामेळाक दामोदर देवळा पसून सुरवात जाली. लोकनृत्य तशेंच ज्युनियर आनी सिनियर गटांतल्यो वेशभुशा सर्ती जोशी चौकांत जाली. लोकसभा वेंचणुकेक लागून आचार संहिता जाहीर जाल्ल्यान अंदूं कांय मेजक्याच पंगडांक, मंडळांक सतींत प्रवेश दिल्लो. तेचप्रमाण सर्त बेगीन सुरू केल्ली. हाका लागून लोकांक चित्ररथ पळोवंक मेळ्ळे.
हाचे पयलीं चित्ररथ, रोमटामेळ, लोकनृत्य, वेशभुशा सर्ती हुतात्मा चौकांतल्यान सुरू जाताल्यो. ताका लागून सगल्या लोकांक त्यो पळोवंक मेळटाल्यो. पूण अंदूं रोमटामेळ, चित्ररथ, लोकनृत्य सर्ती वेगळ्यावेगळ्या सुवातां वेल्यान सुरू केल्यो. ताका लागून ठक्कर हावसा कडेन जे लोक उबे आशिल्ले तांकां रोमटामेळ, लोकनृत्य पळोवंक मेळ्ळें ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
