भांगरभूंय | प्रतिनिधी
सुदैवान कोणाकूच दुखापत जाली ना; खेळां मंत्र्यान दिल्लें आस्वासन पूण…
वास्को: मंगळारा सांजवेळा सरकारी व्यायामशाळेंत कांय तरणाट्यो व्यायामा खातीर आयिल्ल्यो तेन्ना फॉल्स सिलींग पाख्याचो भाग कोसळ्ळो. सुदैवान कोणाकूच दुखापत बी जाली ना. मजगतीं, हे घडणुकेक लागून व्यायामशाळेंत येवपी तरणाटे-तरणाट्यो हांचे मदीं भिरांत पातळ्ळ्या. ह्या व्यायामशाळेची दुर्दशा जाल्ल्यान थंय नवीं उपकरणां आनी सुदारणां करपाचें आस्वासन खेळां मंत्री गोविंद गावडे हांणी दिल्लें. पूण त्या आस्वासनाची कसलीच कार्यवाही अजून मेरेन जाल्ली ना. हे विशीं हांगा विवीध प्रतिक्रिया उक्तायतात.
टिळक मैदान संकुलांत एकूच सरकारी व्यायामशाळा आसा. हे व्यायामशाळेंत तरणाटे-तरणाट्यो नेमान येतात. खाजगी व्यायामशाळेचें शुल्क चड आशिल्ल्यान खूबशे जाण ह्या सरकारी व्यायामशाळेचो लाव घेतात. पूण हे व्यायामशाळेंत नव्या उपकरणांचो उणाव आसा. पावसाच्या दिसांनी हे व्यायामशाळेक गळटी लागता. ताका लागून धोंपरभर उदकांत उबे रावन व्यायाम करपाची पाळी व्यायाम करप्यांचेर येता. हे व्यायामशाळेंत नवीं उपकरणां दिवचीं, गळटी थांबोवची तशेंच हेर सुविधा दिवच्यो ह्यो मागण्यो अजून मेरेन प्रलंबीत आसात. खेळां मंत्री गावडे वास्को आयिल्ले तेन्ना तांणी मुद्दाम हे व्यायामशाळेक भेट दिल्ली. त्या वेळार तांणी थंयची परिस्थिती पळोवन अजाप उक्तायिल्लें. सगल्यो सुविधा रोखड्या रोखड्यो दिवपाचें आस्वासन तांणी दिल्लें. पूण तीं अस्वासनां अजून पुराय जाल्लीं नात.
हे व्यायामशाळेंत फॉल्स सिलिंगाच्या पाख्याचो भाग सकयल हुमकळटालो. तो केन्ना कोसळत हाचो नेम नाशिल्लो. मंगळारा सांजवेळा कांय तरणाट्यो व्यायायामा खातीर आयल्यो तेन्ना अचकीत फॉल्स सिलिंगाच्या पाख्याचो भाग कोसळ्ळो. हाका लागून त्या तरणाट्या चलयांची धांवपळ जाली. सुदैवान त्यो वाटावल्यो. हे घडणुकेक लागून थंय येवपी तरणाटे, तरणाट्यो हांचे मदीं भिरांत पातळ्ळ्या.
सरकारान हे व्यायामशाळे कडेन लक्ष दिवन थंय दुरुस्तीचें काम करचें तशेंच थंय नवीं उपकरणां दिवचीं अशी विनंती तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
