भांगरभूंय | प्रतिनिधी
पणजी : छत्रपती शिवाजी महाराजां विशीं आक्षेपार्ह वक्तव्य केल्ल्या प्रकरणांत चिखले इगर्जेचे धर्मगुरु बोलमॅक्स परेरा हांचे आड वास्को पुलिसांनी दाखल केल्लो गुन्यांव गोंयच्या मुंबय उच्च न्यायालयान रद्द केला. हे विशींचो निवाडो न्या. महेश सोनक आनी न्या. वाल्मिकी मिनिझीस ह्या दोन वांगड्यांच्या न्यायपीठान दिला.
चिखले, वास्कोचे इगर्जेचे धर्मगुरु बोलमॅक्स परेरा हांणी ऑगस्ट २०२३ त चर्चींत हाजीर आशिल्ल्यांक मार्गदर्शन करतना छत्रपती शिवाजी महाराजां विशीं वादग्रस्त विधान केल्लें. तांचे आड राज्यभरांतल्यान प्रतिक्रिया आयले उपरांत तांणी ह्या वक्तव्या विशीं चूक मागिल्ली. मजगतीं शिवप्रेमींच्यो भावना दुखावल्ले खातीर किरण नायक हांणी संघटणे वतीन वास्को पुलीस स्टेशनांत कागाळ दाखल केल्ली. उपरांत वास्को पुलिसांनी परेरा हांचेआड गुन्यांव नोंद केल्लो. उपरांत परेरा हांणी मडगांवां दक्षीण गोंय जिल्हो आनी सत्र न्यायालयांत अटकपूर्व जामीन अर्ज दाखल केल्लो. न्यायालयान तांकां २० हजारांचो वयक्तीक बॉंड, तितलेच किमतीचो हमीदार आनी हेर अटींचेर सशर्त अटकपूर्व जामीन मंजूर केल्लो.
उपरांत परेरा हांणी गोंयच्या मुंबय उच्च न्यायालयांत याचिका दाखल करून वयलो गुन्यांव रद्द करपाची मागणी केली. तातूंत तांणी राज्य सरकार, वास्को पुलीस आनी किरण नायक हांकां प्रतिवादी केले. हे विशीं उच्च न्यायालयांत सुनावणी जाले उपरांत परेरा हांचे आड दाखल केल्लो गुन्यांव रद्द करपाचो आदेश दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
