भांगरभूंय | प्रतिनिधी
वास्को : वास्कोच्या हार्बर रस्त्यार घोग्यांनी पडिल्ल्या पावसाक लागून पालसणां कोसळून जाल्ल्या घडणुकेंत मनोरंजन बिंद ह्या मजुराक मरण आयलें. हांगा राखणे वणटीचें काम सुरू आसतना ही घडणूक घडली.
हे विशीं सुत्रांनी दिल्ले म्हायती प्रमाण, काल रातीं सुरू आशिल्ल्या कामा मजगतीं अचकीत पालसणां कोसळ्ळीं. ह्या वेळार घडणुके सुवातेर सुमार चार मजूर काम करताले. तांतल्या तीन मजुरांनी प्रसंग वळखून स्वताचो जीव वाटयलो, मात मनोरंजन बिंद हे चिखला पोंदाक आडकले.
हे घडणुकेची म्हायती मेळटांच उजो पालोवपी दळ आनी पुलिसांनी बेगोबेग घडणुके सुवातेर धांव घेवन बचावकार्य सुरू केलें. उजो पालोवपी दळान व्हडा यत्नां उपरांत चिखलाचे राशी पोंदाक आडकल्ली कूड भायर काडली.
हे घडणुकेंच दोन मजूरजखमी जाल्यात. तांकां उपचारा खातीर हॉस्पिटलांत दाखल केल्यात. सेगीत पडपी पावसाक लागून पालसणां कोसळिल्ल्यान ह्या वाठारांत आतां भंयाचें वातावरण निर्माण जालां. प्रशासण हे विशीं तपासणी करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
