भांगरभूंय | प्रतिनिधी
मुरगांव, प्रतिनिधी: साई नगर, फकीर गल्ली वास्को हांगा सिलिंडर गॅसीचे गळटेक लागून एकल्याक मरण आयलें. ही घडणूक आयतारा सकाळीं घडली. जाल्यार हेर तीग जाण बेशुद्ध जाले. तांचेर गोमॅकोंत उपचार सुरू आसात.
मेळिल्ले म्हायती प्रमाण, अनिल बिंद (१९), अमन यादव (२२), धर्मवीर बिंद (२१) आनी संजय बिंद (२१) हे सगळे मूळ उत्तर प्रदेशांतले तरणाटे मांगोरहील फकीर गल्ली वास्को हांगा रावताले. हातुंतल्या संजय बिंद (२१) हाका मरण आयलें. हालींच कामा निमतान गोंयांत आयिल्ल्या ह्या तरणाट्यांनी फकीर गल्लींत दोन कुडी भाड्याक घेतिल्ल्यो. आयतारा सकाळीं त्या सगळ्यांक शेजारचे कुडींत रावपी इश्टान उठोवपाचो यत्न केलो. मात त्या सगळ्यांनी कांयच प्रतिसाद दिवंक ना. मुखेल दार भितरल्यान बंद आशिल्ल्यान तांकां हुस्को जालो. हाची म्हायती तांणी वास्को पुलिसांक दिली. पुलीस घडणुके सुवातेर दाखल जाले. उपरांत तांणी हेरांचे मजतीन दार उघडलें. कुडींत प्रवेश करिना फुडें चारूय इश्ट बेशुद्ध अवस्थेंत सांपडले. उपरांत चोवगांकूय १०८ ऍम्बुलन्सींत चिखलेच्या जिल्हो हॉस्पिटलांत व्हेले. तेन्ना डॉक्टरांनी संजय बिंद हाका मरण आयिल्ल्याचें सांगलें. हेर तिगांकूय फुडलया उपचारा खातीर गोमॅकोंत धाडले.
मरण आयिल्लो संजय बिंद हाची कूड पोस्टमार्टमा खातीर मडगावां जिल्हो हॉस्पिटलांत धाडल्या. वास्को पुलीस स्टेशनाचे प्रभारी पुलीस निरीक्षक आनंद शिरोडकार हांच्या मार्गदर्शना खाला उपनिरीक्षक अर्चना गांवकार फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
