भांगरभूंय | प्रतिनिधी
वास्कोकार बेजारः भलायकेचेर वायट परिणाम जावपाची उक्तायली भिरांत
भांगरभूंय । प्रतिनिधी
मुरगांवः आयओसी जंक्शन वास्को ते सडा मुरगांव राष्ट्रीय म्हामार्गाचेर बॉक्सायट शिंपडिल्ल्यान सगळे कडेन धुल्लाचें साम्राज्य पाताळ्ळां. हो वाठार बॉक्सायटच्या धुल्लान प्रदुशीत जाला. हो धुल्ल लोकांच्या घरांनीय घुसला. लोकांच्या घरांनी कोळसा वांगडा आतां बॉक्सायटाचोय धुल्ल जाल्ल्यान लोकांनी नाराजी उक्तायल्या.
मुरगांव बंदरांत 10 आनी 11 बर्थचेर बोटींतल्यान बॉक्सायट आयलां. तें बोटींतल्यान देंवोवन ट्रकांनी भरले उपरांत ताची रस्त्या वयल्यान कर्नाटकांत येरादारी करतात.
मजगतीं, वाडट्या प्रदुशणाक लागून वास्कोंतलील कोळसो आनी बॉक्सायट येरादारी बंद केल्ल्यान 9 नंबराचे गेटींतल्यान ती येरादारी करिनासतना थेट गेट क्र. 1 हार्बर वाठारांतल्यान करतात. जेन्ना मुरगांव बंदरांत हार्बर ब्रेक वॉटर धक्याचेर पर्यटक बोट येता तेन्ना कोळसो आनी बॉक्सायट येरादारी गेट क्र. 1तल्यान आयओसी जंक्शन मार्गान जेटी, सडा मुरगांव वाठारांतल्यान करतात. बॉक्सायट आनी कोळशाची ट्रकांतल्यान येरादारी करतात तेन्ना ताचो पिठो रस्त्याचेर पडटा. हाका लागून पुराय राष्ट्रीय म्हामार्ग कोळशा वांगडा बॉक्सायटाक लागून तांबडो जाल्लो दिसता. ह्या राष्ट्रीय म्हामार्गाचेर दिसाक शेंकड्यांनी गाडयो येरादारी करतात. लोकांचीय गर्दी आसता. तशेंच राष्ट्रीय म्हामार्गाचेर दोंगुल्लेचेर शेंकड्यांनी लोकांची वस्ती आसा. ट्रकांतल्यान पडपी कोळशाचो आनी बॉक्साटाचो पिठो वाऱ्या वांगडा लोकांच्या घरांनी वता आनी ताचो घरांतल्या लोकांक त्रास जाता. ह्या मार्गा वयल्यान येरादारी करपी वाहन चालकांकूय ह्या धुल्लाचो हिसपा भायर त्रास जाता. ह्या धुल्लाक लागून दुयेंसां वाडपाचोय धोको निर्माण जाला. हे खातीर थळाव्या लोकांनी नाराजी उक्तायल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
