वास्को अपघात प्रवण क्षेत्रांची पुलिसां कडल्यान पळोवणी

भांगरभूंय | प्रतिनिधी

नेम मोडप्यां कडल्यान 17,500 रुपया वसूल

वास्को: वास्कोचे उपविभागीय पुलीस अधिकारी सलीम शेख, निरिक्षक कपील नायक हांणी वास्को पुलीस शिमेंतल्या अपघात प्रवण क्षेत्राची मंगळारा रातीं पळोवणी केली. हे संबंदीचो अहवाल ते सरकाराक धाडटले. अपघातांक आळो घालपा खातीर कसली उपाय येवजण करूंक जाय हे संबंदी चर्चा करतले अशें सलीम शेख हांणी सांगलें.

मजगतीं, येरादारी नेम मोडप्यां आड वास्को पुलिसांनी बुधवारा सकाळीं कारवाय करतना 24 वाहन चालकां कडल्यान 17,500 रुपयांचो दंड वसूल केलो. पुलिसांनी साद्या भेसांत उबे रावन ही कारवाय केली. पुलिसांचे हे कारवायेक लागून लोकांनी समाधान उक्तायलें. पूण ही कारवाय चालूच दवरपाची गरज आशिल्ल्याची प्रतिक्रिया व्यक्त जायत आसा.

मुरगांव म्हालांत मुरगांव, वास्को, वेर्णें ह्या तीन पुलीस स्टेशनांचो आस्पाव आसा. मुरगांव पुलीस शिमेंत दोन, वास्को पुलीस शिमेंत तीन, वेर्णे पुलीस शिमेंत तीन अपघात प्रवण क्षेत्र आसात. तांची पळोवणी केली. तशेंच नवे अपघात प्रवण सुवाती तयार जाल्यात काय हे संबंदी सर्वे केलो. अपघातांक आळो घालपा खातीर कसली उपाय येवजण हातांत घेवची हे संबंदी तांणी चर्चा केली.

वाहन चालकांनी येरादारीचे नेम मोडचे न्हय हे खातीर हांगा पुलीस आनी येरादारी पुलीस सेगीत काळजी घेतात. मजगतीं, कांय वाहन चालकांच्या एकंदर वृत्ती मदीं अजून फरक पडत नाशिल्ल्याचें दिसून येता. दुचाकी चलयतना हॅल्मेट न घालप, मोबायलाचेर उलोवप, गतीन वाहन चलोवप, वाहन चलोवपाचो परवानो नासतना वाहन चलोवप, चुकीचे दिशेन वाहन चलोवप, वाहन क्रमांक प्लेट नासतना वाहनां चलोवप बी गजाली हांगा पळोवंक मेळटात.

वरुणापुरी ते दाबोळी विमानतळ मजगतच्या म्हामार्गा वयल्यान चुकीचे दिशेन वाहन चलयतना दिसून येतात. साईनगरांतले लोक आपली वाहनां शांतीनगर हांगासरल्या चौकांतल्यान वळोवपा खातीर एक किलोमिटराचो भोवताडो मारचो पडटा म्हूण चुकीचे दिशेन वाहन चलयतात. तांचे आड कारवाय जावपाची गरज आसा. तशेंच सान पिरायेच्या भुरग्यां मदीं लेगीत वाहन चलोवपाच्या प्रकारांक कांयच फरक दिसून येना. पुलिसांक कशें चुकोवचे हें ह्या भुरग्यांक खबर आशिल्ल्यान तशेंच वाहनांक नंबर प्लेट नाशिल्ल्यान ते पुलिसांच्या हातांत सांपडनात. शार वाठारांत येरादारी नेमांक पाळो दिवपी वाहन चालक भितरल्या रस्त्यांचेर नेमांक पाळो दिवपाक विसरतात. अशे तरेच्या वाहन चालकांक पयलीं वठणीर हाडपाची गरज आशिल्ल्याची प्रतिक्रिया लोकांनी उक्तायली.